१०१ दँया गणेशमाया थुकथं कोरोना मुक्त जुयादिल

१०१ दँया गणेशमाया थुकथं  कोरोना मुक्त जुयादिल

असोज १९ - मध्यपुर थिमि नगरपालिका–६, पाचोया गणेशमाया प्रजापतिया उमेर १०१ दँ । वयकयाके वंगु असोज २ य् कोरोना भाइरसया संक्रमण पुष्टि जुगु खः।

असोज २ गते हे वयकया काय् वडा ल्याः ६ या वडाध्यक्ष इन्द्रबहादुर प्रजापति व म्हयाय् पूर्णमाया प्रजापतियाके नं  कोरोना पोजिटिभ खनेदुगु खसाः थ्वया न्हय् वयकया छेय् सहज प्रजापतियाके संक्रमण खनेदुगु खः। 

गणेशमाया असोज १६ गते कोरोना भाइरस संक्रमणं मुक्त जुयादिलसाः वखुन्हू हे  वयकया काय् इन्द्रबहादुर व छेय् सहज नं  कोरोनामुक्त जुयादिइगु खः।  

कोरोनाया वासः क्वालः

कोरोना संक्रमणया इलय् गणेशमायायाके छुं न विशेष कथंया लक्षण खनेमदु । तर सामान्य सेखंमुसु व छाती स्याइगु लक्षण जक खनेदुगु खः।  गणेशमायायाके छुं नं दीर्घल्वय् मदुगु व १० दँ न्हय् पत्थरीया शल्यक्रिया यायेगु झ्वलय् उच्चरक्तचापया वासः नयेमाःगु जुसाः नं २ दँ न्हय् हे वासः नयेम्वाले धुक्कुगु खः।

छुं न ल्वय् मदुसाः नं वयक शारीरिक रुपं धासाः छुं छुं  कमजोर जुयादिइ। उकिइ  वयकलं नियमित भिटामिन ई क्याप्सुल धासाः नयेमाः । छन्हु जक भिटामिन ई मनलकि हे त्यानू चाइगु जुयाच्वन।

होम आइशोलेसन ज्वःछि १०१ दँया गणेशमायायात सुथं न्हापा क्वाःगु लंया वाफ कयादिगु जुयाच्वन । अनं लिपा नेपाली वासः तयातगु क्वाःगु ल त्वनादिगु जुयाच्वन। अनलिपां तिनी च्याः त्वना , सुथसिया ९:३० पाखे ज्यना,  न्हिनय् बजि वहनी ७:३० तापाखें बेली  भपिया दिगु जुयाच्वन धासाः द्येने न्हय् नं क्वाःलया वाफ कयादिगु जुयाच्वन। थुलियाना हे कोरोना त्याकेफुगु  धकाः वयकलं धयादिल।

थज्यागु हे दिनचर्या वयकया काय् इन्द्रबहादुर , म्हयाय् पूर्णमाया  व छेय् सहजया नं खः। फुक्कसियां क्वाःलः व आत्मबल हे कोरोनाया वासः जुगु धयादिल।