वायु प्रदुषणं कोरोना सङ्क्रमण अप्वयेकिगु

वायु प्रदुषणं  कोरोना सङ्क्रमण अप्वयेकिगु

मंसिर ५ - वायु प्रदुषण अप्व दुगु ठासय् च्वनिपिन्के कोरोना भाइरसया सङ्क्रमण व सङक्रमणया कारण सिइगु सम्भावना अप्व जुइगु अध्ययनं क्यगु दु ।

वातावरण संरक्षणलिसें सम्बन्धित विज्ञतयगु कथं कोरोना सङ्क्रमणपाखें सिइपिंमध्ये १५ प्रतिशतति वायु प्रदूषण हे कारण जुगु दु। नेपालय् मनूत सिगुया मू स्वगू कारणमध्ये मुटुसम्बन्धी ल्वय्, स्वँसम्बन्धी ल्वय् व मस्तिष्कघात खः । थुपिं स्वगू ल्वयया सम्बन्ध वायु प्रदूषणलिसें नं दु।

स्वास्थ्य तथा जनसङ्ख्या मन्त्रालयकाया स्वास्थ्य समन्वय महाशाखा प्रमुख डा जागेश्वर गौतमं नेपालय् आवश्यक मापदण्डसिबे ५ गुणा अप्व वायु प्रदूषण दुगु धयादिल । अथेहे वयकलं स्वँ व मुटु ल्वय् लिसें मस्तिष्कघातया प्रमुख कारक मध्ये वायु प्रदूषण नं छगू जुगु धयादिल ।

सन् २०१८ य् वायु प्रदूषणया कारण नेपालय् ३७ द्वः मनूत सिगु ल्याःचा दु ।

विश्व स्वास्थ्य सङ्गठन नेपालया जनस्वास्थ्य प्रशासक डाक्टर खुर्सिद आलम हाइडरं वायु प्रदूषणं कोभिड–१९ या सङ्क्रमण व मृत्युदर निगुलिइ अप्वयेकि धासें वायु प्रदूषण नियन्त्रणया लागि नगरपालिकातयत प्राविधिक ग्वाहालि यायेत संगठन तयार दु धयादिल ।

वातावरणविद् सञ्जयनाथ खनालं वायु प्रदूषण नियन्त्रणया लागि ट्राफिक व्यवस्थापन लिसें यातायातय् सुधार, लँय् धुँ नियन्त्रण, उद्योगय् सुधार व फोहर च्याकिगु ज्या दिकेमाःगुलिइ बः बियादिल ।

वातावरण विभागया उपमहानिर्देशक इन्दु जोशीया कथं दँय् दसं चिकुलाय् वायु प्रदूषण दकलें अप्व जुइगु व वइगु २, ३ लाय् स्वनिगःया वायु प्रदूषण ह्वातं थहाँवनिइ।