“गिरिजाप्रसादया समालोचना” सफुया पितव्बज्या

“गिरिजाप्रसादया समालोचना” सफुया पितव्बज्या


पुस ५ -  महाकवि गिरिजाप्रसादं थःगु जीवनकालय् थीथी च्वमितयगु कृतियात कया यानादिगु समालोचनातयगु मुनाः “गिरिजाप्रसादया समालोचना” सफुया पितव्बज्या जुगु दु।

सक्वः कृषि फार्मंया ग्वसालय् म्हिगः सक्व सभाहलय् जुगु ज्याझ्वलय् नेपाल प्रज्ञा प्रतिष्ठानया प्राज्ञ  साहित्यकार ध्रुव मधिकर्मीइ “गिरिजप्रसादया समालोचना”या पितव्वज्या यानादिगु खः। कुतः पिकाकया कजि विमल ताम्राकारया सम्पादकीय पिहाँवगु सफूया फुक्क  खर्च सक्वः कृषि फार्मंया  थुवाः ई. राजदास श्रेष्ठं यानादिगु खः।

ज्याझ्वलय् भाषा संस्कृति, कलाक्षेत्र, भजन किर्तन, पत्रकारिता क्षेत्रय् योगदान यानादिपिं व्यक्तित्वत लिसें  “लावण्य सन्देश” साप्ताहिकयात हंगु खः। सक्वया पुलांम्ह  भजनप्रेमीलिसें भाषासेवी रञ्जन श्रेष्ठ, पत्रकारपिं कुमार रञ्जित, सिल्भिया श्रेष्ठ राजोपाध्याय, पवन लाल श्रेष्ठ व सजना तिमिल्सिनायात सम्मानपत्रलिसें नगदराशी लिसें हंगु खः ।

ज्याझ्वलय् प्रकाशमान सक्व, लक्ष्मीनारायण शाही, रामेश श्रेष्ठं, धर्मराज राजकर्णिकारं थःगु रचना पाठलिसें महाकविं च्वयादिगु म्ये हालादिगु खः ।

ज्याझ्वलय् प्राज्ञ मधिकर्मीं  गिरिजाप्रसादया समालोचना आःवया जक ब्वनेखंगु सौभाग्यया खँ जुसाः नं थुलिमछि दँतक वयकया कृतिबारे बेखबर जुगु दूर्भाग्य जुगु धयादिल।

ज्याझ्वलय् कृषि फार्मया थुवा लिसें ज्याझ्वया सभापति ई. श्रेष्ठं महाकवि गिरिजाप्रसादया कृतित पिकायेगु , अध्ययन अनुसन्धान याइपिन्त ग्वाहालि यायेत थः न्ह्याबलें तयार दु धासें मेगु २ गू कृतित नं याकनं पिहाँवइगु जानकारी बियादिल ।

ज्याझ्वलय् महाकविया तधिम्ह काय्  कुञ्ज जोशीइ महाकविया देनबारे चर्चा यासें नेपाल भाषा साहित्यय् म्वाःबलय् न व सिइधुक्कां नं महाकविं तसकं बय् बय् जुगु गौरवया विषय जुगु धासें महाकवि गिरिजा वामपन्थी विचारधाराया व्यक्तित्व जुगु व तत्कालिन पञ्चायती व्यवस्थाविरुद्धया संघर्षया कारण जेलय् लाःबलय् याःगु दूर्व्यवहारया कारणं याकन हे मदुगु धयादिल।

वयकलं महाकविया राजनैतिक विचारधारा व योगदानबारे चर्चा याये आवश्यक जुगु खँ तयादिल ।

ज्याझ्वलय् वरिष्ठ पत्रकार नरेशवीर शाक्य, साहित्यकार नारद बज्राचार्य, विमल ताम्राकार, ज्ञानीरत्न मानन्धर लगायतं थःथगु विचाःतयादिगु खःसाः कोरोना संक्रमणया दथुइ जुगु ज्याझ्वलय् साहित्यकार, भाषासेवीतयगु ख्वातुक्क उपस्थिति दुगु खः।