मदुम्ह देव बहादुर डंगोलया लुमन्तिइ

मदुम्ह देव बहादुर डंगोलया लुमन्तिइ

नेवाः जाति, भाषा, धर्म, संस्कृति ख्यलय् मचा ल्याय्म्ह बैंसंनिसें मद्दिक न्ह्यचिलाः समाज व देयया निम्तिं तःधंगु योगदान बियादिम्ह देव बहादुर डंगोल नेपाल सम्वत् ११४० कौलाथ्व पारु( २०७७ कार्तिक १ गते) ८४ दँया बैशय् आकाझाकां मन्त। वयक बौ न्हुच्छेराज डंगोल व मां चिरिमैं डंगोलया कोखं वि.सं. १९९३ फागुन शुक्ल त्रियोदशी खुन्हू यलया खोनाय् जन्म जुयादिगु खः।

खोनाया परम्परा कथं मन्त्री कुनामं छायपियातम्ह वय्कलं रुद्रायणी माध्यामिक विद्यालय सञ्चालक समिति व युवा प्रतिभा विद्या मन्दिर मा. वि. निर्माण समितिया अध्यक्ष जुयाः पलिस्था यायेत व न्ह्याकेत तःधंगु योगदान यानादीगु खः । गुठी निर्णोद्वार एवं निर्माण समिति व भक्तपुर विकास परियोजनाय् निगू दशकं मल्याक थीथी जिम्मेवार पदय् च्वनाः नेपाःया राष्ट्रिय सम्पदा भिंकेगु व पुनःनिर्माण यायेगु ज्याय् वय्कलं महत्वपूर्णगु भूमिका म्हितादीगु खः ।

वि.सं. २००८ सालं किसान संगठनया सदस्य जुयाः राजनैतिक चेतना थनेगु ज्याय् नं वय्कः न्ह्यचिलाः दीगु दु। खोकना गाउँ पञ्चायतया वडा सभासद, वडा अध्यक्ष व कार्यभार प्रधानपञ्च जुयाः नं तःदँ मछि उगु लागाया विकास निर्माण व समाज उन्थानया ज्याय् तसकं मेहनत यानाः न्ह्यचिलादीगु दु । थथे हे वय्कलं उगु लागाया धार्मिक विकासया ज्याय् नं उल्लेखनीय योगदान यानादीगु दु। जितापुर गन्धकुटी विहारय् नं अध्यक्ष जुयाः तन, मन, धन पानाः जग्गा चूलाकाः भवन निर्माणया नापनापं ब्यवस्थापनया ज्याय् तःधंगु योगदान यानादीगु दु। भिलेज कोर खोकना, लिधंसा सहकारी संस्थाया संस्थापक जुयाः व सिकाली मन्दिर निर्माण समिति व खोकना कार्य विनायक सडक निर्माण समितिइ अध्यक्ष जुयाः सेवामूलक ज्या यानादीगु दु ।

लिधंसा पासा पुचः खोनाया प्रतिनिधिकथं वय्कः नेवाः राष्ट्रिय संगठन, नेवाः देय् दबूया संस्थापक जः जुयादीम्ह वय्कलं न्हूदँ समारोह समिति खोनाया नायः जुयाः खोनाय् नेपाल सम्वत् प्रचार यायेगु ज्याय् योगदान यानादीगु दु। ऐतिहासिक व सांस्कृतिक खोना देयात विश्व सम्पदा धलखय् दुथ्याकेमाः धकाः तःदँ न्ह्यःनिसें वय्कलं सः थ्वयेकाः झायाच्वनादीगु खः ।

ज्यापु महागुथि यल जिल्लाया पुलांम्ह नायः जुयाः ज्यापु महागुथि नेपाः थ्व अवस्थाय् थ्यंकेत वय्कलं तःधंगु हिचःति हायेकादीगु दु। थुकथं हे ज्यापु महागुथिपाखें लुम्विनी निर्माण जूगु पलिस्वां पुखू धस्वाकेत दुजः जुयाः वय्कलं श्रम व्यवस्थापनय् तःधंगु योगदान यानादीगु खः । वय्कःया योगदानयात मूल्यांकन यानाः ज्यापु महागुथिं वय्कःयात संरक्षककथं हनाबना तयातःगु दु। लिसें तत्कालीन प्रधानमन्त्री शुशील कोइरालापाखें वय्कःयात महागुथिया स्वक्वःगु तःमुँज्याय् सम्मान यानादिगु खः । सूचक दीप मण्डलीपाखें ‘राष्ट्रिय बौद्ध पुरुस्कारं’ व गणबहाल महाविहारपाखें ‘धर्म विजय पदनमं’ सम्मानीत जुयादीगु दु। थुकथं हे वय्कःयात नेवाः देय् दबू, नेवाः स्वायत्त राज्य मंकाः संघर्ष समिति, ज्यापु महागुथि नेपाः, यल जिल्ला समिति, लिधंसा पासा पुचः, श्री रुद्रायणी स्वर्ण जयन्ती समिति, प्रेम-मोहन सिरपाः गुथि, पिस गार्डेन सेकेण्डरी स्कुल आदि संघ संस्थां भाषा, संस्कृति, धर्म, शिक्षा ख्यलय् वय्कलं यानादीगु योगदानयात कदर यानाः तःजिक सम्मान याःगु दु ।

वय्कः छम्ह तःधंम्ह सांस्कृतिककःमि नं खः । वय्कः थः श्रद्धेय गुरु लाल महर्जनपाखें दिक्षित जुयाः थः हे मूगुरु जुयाः च्यादँ न्ह्यःतिनि न्हना वनेत्यंगु खोनाया महत्वपूर्णगु परम्परागत तान्त्रिकयुक्त भिंप्याखं ‘एकादशि व्रत’ स्यनाः क्यनेगु नापं न्हूपुस्तायात हस्तातरण यायेगु ऐतिहासिक ज्या जूगु खः ।  वय्कलं नेवाः संगीत विकासया खँ जक ल्हानामदी थःम्हं हे दाफाया खिं थायेगु, बासुरी व कार्नेस पुइगु सयेकाः स्यनाः थुकीया संरक्षण यायेगु ज्याय् न्ह्यथनेबह जुइक योगदान यानादीगु दु । थुकथं हे वय्कः छगू जमानाय् तसकं बांलाःम्ह हिरो कथं नांजाःम्ह छम्ह स्यल्लाःम्ह नासलंलीम्ह कलाकार नं खः । वय्कः रामायण प्याखनय् दशरथ जुयाः, लवकुश प्याखनय् बाल्मीकी जुयाः सफल अभिनय यानादीगु खः । वय्कलं एकादशी भिंप्याखंया नापनापं श्रवणकुमार, पाण्डव राजा, भक्तप्रल्हाद, कविरकुमार प्याखं, विशन्तर प्याखं, मधुमालती प्याखंया मूगुरु जुयाः स्यनादीगु खः ।

वय्कलं यानादिगु योगदान न्ह्याबलें हे लुमन्तिकथं झि दथुइ ल्यनाच्वनिइ।