ठेचो नवदुर्गा देगलय्  गजू तल

ठेचो नवदुर्गा देगलय्  गजू तल


असार ३१ - यलया ठेचोय् दुगु लिच्छविकालिन नवदुर्गा भवानीया देगलय् गजू तगु दु। २०७२ सालंया भ्वखाचं क्षति जूगु देगः पुनःनिर्माण याना विहिबाः धार्मिक ज्याझ्वः याना गजू तगु खः। पुरात्तत्व विभागं पुनःनिर्माण यायेत २०७६ य् भ्याट बाहेक २ करोड १६ लख ६३ दवः २६६ तका बजेट फ्यागु खः । 

नवदुर्गा भवानी देवी गुठी अध्यक्ष धर्मराज मालीइ देगःया सतः संग्रहालयया रुपय् परिणत यायेगु योजना दुगु धयादिल। नवदुर्गा देगःया मेगु गुठी छेँय् निर्माण क्वःचालकि अन संस्कृति सम्पदाबारे अध्ययन अनुसन्धान यायेत वइपिं विदेशीतयगु लागि होमस्टे दयेकेगु लक्ष्य दुगु धयादिल।

गोदावरी नगरपालिकाया मेयर गजेन्द्र महर्जनं देगःलिसें नवदुर्गा प्याखं संरक्षण प्रवद्र्धन यायेत अक्षयकोषया व्यवस्था यानागु धयादिल। १२ दँया जात्रा सञ्चालन यायेत नं बिस्कं हे अक्षयकोषया व्यवस्था जूगु वय्कलं धयादिल। 

नवदुर्गा देगः ठेचाया रैथानतय्गु इष्टद्यः खःसाः स्वनिगःया थीथी शक्तिपिठमध्ये छगु खः।  नवदुर्गा प्याखं दँय् दंस मोहनीया चालं व कतिं पून्हिया झवलय् ४ न्हू यल लाय्कुया मूचुकय् प्रर्दशन यायेमाःगु प्रचलन दु । यल लाय्कुलिसें सम्बन्धित दकलें पुलांगु जात्रा लिच्छवी जुजु मानदेवं स्थापना याःगु मनमानेश्वरी द्यःया पूजाविधि पर्व व नवदुर्गा प्याखं खः।ठेचोय् नवदुर्गा देगः स्थापना यानाः ७०० छेँय् परिवार तया ठेचो बस्ती स्थापना याःगु देवमाला वंशावलीइ न्ह्यथनातगु दु।