आइसियू मदया त्रिवि शिक्षण अस्पतालया वरिष्ठ कर्मचारी राजाराम इटनी सित

आइसियू मदया त्रिवि शिक्षण अस्पतालया वरिष्ठ कर्मचारी राजाराम इटनी सित

कार्तिक १९ - आइसियूया अभावय् त्रिवि शिक्षण अस्पताल महाराजगञ्जय् कार्यरत छम्ह वरिष्ठ कर्मचारी सिगु दु।

अस्पतालय् वरिष्ठ लेखापालया रुपय् २५ दँति कार्यरत राजाराम इटनी सिगु खः।स्वासप्रश्वासय् आकाझाकां समस्या वसेलिइ इटनीयात त्रिवि शिक्षण अस्पताल यंकुगु खः। चिकित्सकतयसं भेन्टिलेटरनापंया आइसियूया आवश्यक जुइगु धागु खः । तर, त्रिवि शिक्षण अस्पतालय् आइसियू खाली मदु। कर्मचारी व थथितिपिन्सं मेमेगु फुक्कं अस्पतालय् आइसियू माल, गनं नं आइसियू खाली लुइकेमफत ।

थथितिपिन्सं करुणा अस्पतालय् आइसियू खाली जुइत्यन धकाः करुणा अस्पताल यंका भर्ना यात। आइसियू इन्चार्ज डा.सुवास आचार्यं कोभिड व ननकोभिड निखें हे भेन्टिलेटरनापंया आइसियु खाली दुगु जानकारी वयेसातकि इटनीयात उपचारया लागि हाकनं शिक्षण अस्पताल हयेत इनाप यानादिल। थथितियात खबर याःबलय् तक ५४  दँया इटनी  करुणा अस्पतालय् मंगलबाः सुथय् मदयेधुक्कंल ।

धादिङया त्रिपुरासुन्दरीया इटनीइ थः हे ज्या यानाच्वंगु अस्पतालय् नापं आइसियू मदया सिइमाल। वयकयात कोरोना संक्रमण जुगु आशंका यागु दु । छुं दिंनिसें म्ह स्याइगु, हल्का ज्वर वइगु जुसेलिइ इटनीइ छेँय् हे आराम यानाच्वनादिगु खः । सोमबाः चान्हय् धासाः आकाझाकां स्वासप्रश्वासय् समस्या वगु खः।

किजा नवराज इटनीं २५ दँतक ज्या यागु त्रिवि शिक्षण अस्पतालय् आइसियू मदया थः दाजु सिइमाःगु धयादिल। वयकलं द्वलंद्वः मनूतयगु उपचारय् ज्या याम्हसियां हे आइसियू मदया सिइमाल धासाः मेपिं सर्वसाधारणया अवस्था गथे जुइ धकाः सरकारलिसें न्हयसः तयादिगु दु।

राजारामया सिम्ह  त्रिवि शिक्षण अस्पतालय् तयातःगु दु । अमेरिकाय् दुम्ह काय् लिहाँवलकि अन्तिम संस्कार यायेत परिवारया तयारी दु ।