सत्यमोहन लोक साहित्य भवनया निर्माण अन्तिम चरणय्

मंसिर महिनादुने उलेज्या यायेगु कथं ज्या जुयाच्वन

सत्यमोहन लोक साहित्य भवनया निर्माण अन्तिम चरणय्
किपाः राजितबहादुर श्रेष्ठ

मंसिर १५ - वाङ्मय शताब्दी पुरुष संस्कृतिविद् सत्यमोहन जोशीया नामय् निर्माण जुयाच्वंगु ‘सत्यमोहन लोक साहित्य भवन’ या निर्माण अन्तिम चरणय् थ्यगु दु। 

लोक साहित्यया संरक्षण व प्रवद्र्धन यायेगु उद्देश्यं लोक साहित्य परिषदं यल महानगरपालिका–१२ बखुंबहालय् संस्कृतिविद् सत्यमोहन जोशीया निजी छेँय् परिसरय् लोक साहित्य भवन निर्माण यानाच्वंगु खः। भवन निर्माणया लागि संस्कृतिविद् जोशीं २ आना २ पैसा जग्गा परिषद्यात दान बियादिगु खः। 

यलया प्रतिनिधिसभा सदस्य कृष्णलाल महर्जनया निर्वाचन क्षेत्र पूर्वाधार विकास कार्यक्रमया ५० लख तकां भवनया निर्माण ज्या शुरु जुगु भवन निर्माण समितिया सचिव राजितबहादुर श्रेष्ठं धयादिल। निर्माणज्या आ: अन्तिम चरणाय् थ्यगु व फयांफतलें मंसिर महिनादुने भवनया उलेज्या यायेगु कथं ज्या जुयाच्वंगु वयकलं धयादिल। उपभोक्ता समिति मार्फत निर्माण जुयाच्वंगु भवनय् आ:तक ६० लखतकाति खर्च जुइधुक्कुगु व वल्र्ड नेवा अर्गनाइजेसनपाखें १४ लख ,थीथी दातापाखें ८ लख  ५० द्वःतकाति  ग्वाहालि वयेधुक्कुगु वयकलं धयादिल। 

प्यतजाया भवनय् बैठक कक्ष, सङ्ग्रहालय, सफुकुथि लगायत तइगु जुगु दु।