थप ६ कम्पनीया स्यानिटाइजर प्रतिबन्ध

थप ६ कम्पनीया स्यानिटाइजर प्रतिबन्ध

मंसिर ५ - औषधि व्यवस्था विभागं ६ कम्पनीया स्यानिटाइजरय् प्रतिबन्ध तःगु दु।

विभागं लिपांगु इलय् बजार अनुगमनया झ्वलय् थीथी कम्पनीया उत्पादनय् मानव स्वास्थ्यय् हानि याइगु मेथानोल लुसेलिइ मिइत प्रतिबन्ध तःगु खः। बजारय् बिक्रीवितरणय् दुगु ह्यान्ड स्यानिटाइजरया नमूना सङ्कलन याना राष्ट्रिय औषधि प्रयोगशालाय् परीक्षण याःबलय् क्वःछिनातगु मापदण्ड ‘इन्स्ट्यान्ट ह्याण्ड स्यानिटाइजरसम्बन्धी स्तर २०७६’ विपरीत विषाक्त रसाउन मेथानोल लुसेलिइ उत्पादन व बिक्री वितरणय् रोक तयातगु धका विभागया महानिर्देशक भरत भट्टराईं धयादिल।

वयकया कथं सीता हर्बल सुनसरीं उत्पादन याःगु ५० मिलिलिटरय् ८० प्रतिशत व ५०० मिलिलिटरया स्यानिटाइजरय् ८८ प्रतिशत मेथानोल लुगु खः। अथेहे मकालु जडिबुटी सुनसरी, सुनिमा आयुर्वेद कम्पनी मोरङ, एमके हर्बल यल व ग्यालेक्सी डेण्टल एण्ड सर्जिकल मोरङं उत्पादन याःगु स्यानिटाइजरय् मेथानोल लुगु खः।

प्रतिबन्ध तःगु उद्योग व कम्पनीया उत्पादन प्रयोग मयायेत सर्वसाधारणयात इनाप यासें तत्काल बजारय् बिक्रीवितरणय् रोक तयेत व बजारं लितयंकेत निर्देशन ब्यूगु दु। थ्वया न्हय् विभागं गुणस्तरहीन जुगुलिइ भारतीय, चिनियाँ व नेपाली उद्योगं उत्पादन याःगु थीथी कम्पनीया स्यानिटाइजरय् प्रतिबन्ध तयेधुक्कुगु दु।