विकासया नामय् जुयाच्वंगु प्रतिगमनविरुद्ध प्रदर्शन

विकासया नामय् जुयाच्वंगु प्रतिगमनविरुद्ध प्रदर्शन


फागुन १४ - सडक विस्तारया नामय् अन्याय जुइकं विस्थापित याःगुया विरोधय्  प्रदर्शन याःगु दु। शुक्रबाः बृहत नागरिक समाज, बृहत नागरिक आन्दोलन, उपत्यकाव्यापी सडक संघर्ष समिति व नेवाः देः दबु लगायतया थीथी संघसंस्थाया ग्वसालय् येँया माइतीघर मण्डला फिब्वःख्यलय् विरोध प्रदर्शन याःगु खः।

सडक विस्तारया नामय् स्वनिगलय् आदिवासी नेवाःतयत विस्थापित याःगु व सभ्यतानापं विनास याःगुलिइ उकिया विरुद्ध आन्दोलन यानागु धकाः अभियन्तातयसं धागु दु। विकासया नामय् जारी प्रतिगमनविरुद्ध प्रतिरोधया ब्यानर तया जुगु विरोध प्रदर्शनय् मापदण्ड ७–७ मिटर फ्याना थःगु स्वबासी प्रमाणित जग्गाय् छेँय् दना च्वनेगु झिगू नैसर्गिक अधिकार खः थज्याःगु प्लेकार्डलिसें ब्यानर नापं प्रदर्शन याःगु खः ।

माभाय् नवागुया कारण बालाजु बाइपासया स्थानीयतयत प्रहरीइ धरकपड याना नियन्त्रणय् काःगु नेवाः देय् दबुःया नायः नरेश ताम्राकारं धयादिल।

ल्हुति बालाजु बाइपासय् दुगु ४८ छेँय्यात सरकारं अन्याय जुइकं विस्थापित याःगु पीडिततयगु धापू दु। सर्वोच्च अदालतया अन्तरिम आदेश नापं हाचां गाया बिना मुआब्जा, बिना क्षतिपूर्ति सरकारं छेँय् थुगु व उकिया विरोध याबलय् अभियन्तातयत ज्वंगुलिइ इमिगु रिहाइया मागलिसें  कानूनी राज्यया माग यासें विरोध प्रदर्शन याःगु खः। अदालतं हे अन छुं कथंया दयेकेज्या यायेमते धयातःगु खःसा उकिया विरोध याःपिं सुमन सायमि, महेश्वर मानन्धर, रुक्षित श्रेष्ठ, मनोज श्रेष्ठ, भीमदेव श्रेष्ठ, मीन शाही, निरञ्जन श्रेष्ठ व सञ्जय तामांगयात वंगु बुधबाः ज्वगु खः।

आः वयकपिन्त महानगरीय प्रहरी वृत्त ल्हुतिइ, महानगरीय प्रहरी वृत्त सोह्रखुट्टेय् यंकुगु अभियन्ता रविन्द्र कुमार श्रेष्ठं धयादिगु दु।

वयकपिं च्याम्हसित सरकारं मुद्दा तयाः ताःहाकः कुनेत स्वःगु अधिवक्ता जितेन्द्र बज्राचार्यं धयादिल। नापं थम्ह  सर्वोच्चय् सरकार विरुद्ध बन्दी प्रत्यक्षीकरणया रीट तयागु धकाः अधिवक्ता बज्राचार्य धयादिल।