ख्वपय् थनिनिसें मुपात्र जात्रा

ख्वपय् थनिनिसें मुपात्र जात्रा


असोज ५ - येँन्याः नखया झ्वलय् ख्वपया हनिगु मुपात्र जात्रा थौं सनिलनिसें न्ह्यायेत्यगु दु। थीथी धार्मिक ग्रन्थया आधारय् तयार याःगु मुपात्र जात्रा ख्वपय् यंलागा द्वितीयानिसें चौथीतक स्वन्हू न्हयाइगु खः ।

जात्राय् मुपात्र प्रमुख व धिःचा नांया नेपिं निम्ह ग्वाहालिमिपिंनापं स्वम्हसित राक्षसया लं फिकाः ख्वालय् थीथी रङं समाः याना तरबार ज्वकाः ख्वपदेय् चाहिकिगु प्रचलन दु। थथे देय् चाहिली बलय् त्वाःत्वालय् थनातःगु यमःद्योयात मुपात्रं स्वकः चाहिला तरबारं पालिइ।

जात्रा सुरु जुइन्हय् सःकुलान त्वाःया मानन्धर समुदायं दत्तात्रयय् दुगु भीन्द्योया देगः न्हय्र छज्वः याँमतः चाकिइ। याँमता त्रिशूल आकारया जुइ। अथेहे थौं हे तचपालया सँला गणेद्यःयात खटय् विज्याका जात्रा याइ । अनंलिपा तिनी मुपात्र जात्रा पिथनीइ। जात्राय् याँमता, गणेद्यः व मुपात्रयात यमःद्यो दुगु ठासय् चाहिकिइ ।

जात्राया निन्हूया दिं कन्हय् बहनी गोमारीया मानन्धर समुदायया याँमतःलिसें चोछें त्वाःया छुमा गणेद्यःया जात्रा याइ। थ्व खुन्हू गोमारीया मानन्धर समुदाय छुमा गणेद्यःथाय् वनाः सुकुन्दा च्याकाः वयेधुक्कांतीनी गोमारी मानन्धर चोकय् छप्वाः याँमतः च्याकाः जात्रा याइ। याँमतः चाकेधुक्कां चोछें त्वाःया छुमा गणेशद्यःयात खटय् विज्याकाः दरबार स्क्वायरया तलेजु भवानी दर्शन याकिइ। याँमतः दरबार स्क्वायर थ्यनकि थीथी बाजं थाना याँमतः, छुमा गणेद्यः व मुपात्र जात्रा यानाः देय् चाहिकिइ । चान्हय् सँला गणेद्यः व छुमा गणेद्यःयात थःथःगु द्योःछे विज्याकिइ ।

जात्राया स्वन्हूहूया दिं कसं अर्थात् यंलागा चौथी खुन्हू तमारीइ दुगु आकाश भैरवयात गुठी संस्थान ज्याकुपाखें सरकारी पूजा याइ। पूजा क्वचायेधुक्कां क्वय्याःगु त्वाः तपालछीं व तेखाचोया मानन्धर समुदायं भैरवया देगलय् वनाः सुकुन्दा च्याका हइ। वहे सुकुन्दाय् बुलुचाय् द गु ल्वहँहितिइ छज्वः याँमतः च्याकिइ। च्याकेधुक्कां याँमतःलिसें तमारीया आकाश भैरवया मेगु स्वरुप मसान भैरवया खःजात्रा याइ। थ्व दिं जात्राय् नायखिं बाजं थाना भैराद्यःया खःयात देय् चाहिकिइ।

भैराद्यःया खःजात्रा लिपा स्थानीय लाकुलाछें त्वाःया समुदायं पुलुया च्वय् वँचुगु कापंत तपुयाः न्हयनेयाः ब्वय् किसया स्वः तया पुलुकिसी जात्रा न्ह्याकिइ। ख्वपय् पुलुकिसिया स्वः थिइमज्यूगु मान्यता दु। तमारीया भैराद्यःया देगः न्ह्यने स्वःचाः चाहिकाः पुलुकिसी जात्रा सुरु याइ। जात्राय् पुलुकिसीयात प्यम्हसियां बुयाः हइसाः छम्हसियां पुलुकिसीदुने च्वनाः गं न्याकिगु परम्परा दु ।

जात्राय् पुलुकिसीइ गथें जुयाः मुपात्र नापलात धाय् न्हूयाः स्यासाः नं किसि जुइम्ह पात्र व वयां ग्वाहालिमितय्त कानुनं मथिइगुलिपं थ्व खुन्हू पुलुकिसी जात्रा देय्या बच्छिं मल्याक ठासय् चाहिकेधुक्कां तिनी मुपात्र जात्रा पिकाइ। थ्व खुन्हू ख्वपया भैराद्यःया देगलं मुपात्र जात्रा पिकाइ।

जात्राय् मुपात्र जुइम्ह मनूया आजन्म जात वनिगुलिसें जा व ल चले मजुइगु सजाँय बिइगु प्रचलन दु । उकिइ थ्व जात्राय् स्थानीय मनूत मजुसें विकट ठाय्या मनूतयत मुपात्र यानाच्वगु गुठी संस्थानं धागु दु ।