ल्याण्डिङ गियर फेल जुयाः विराटनगरं लिहाँवगु बुद्ध एयरया जहाज त्रिभुवन विमानस्थलय् सफल अवतरण

ल्याण्डिङ गियर फेल  जुयाः  विराटनगरं लिहाँवगु  बुद्ध एयरया जहाज त्रिभुवन विमानस्थलय् सफल अवतरण


असोज ११ -  सोमबाः बुद्ध एयरया निगः विमानय् समस्या वसेलिं  गन्तव्यय् अवतरण यायेमफया येँय् लिहाँवगु दु। सुथय्  त्रिभुवन अन्तर्राष्ट्रिय विमानस्थलं विराटनगरया लागि ब्वःगु विमान विराटनगरय् अवतरण यायेमफया येँय् लिहाँवगु खः।

अथेहे येँय् नं पोखराया लागि  ब्वःगु मेगु विमानय् नं समस्या वसेलिं येँय् लिहाँवगु दु।

निगःलं विमान त्रिभुवन अन्तर्राष्ट्रिय विमानस्थलय् सकुशल अवतरण याःगु त्रिभुवन विमानस्थलया प्रवक्ता रिञ्जे शेर्पां जानकारी बियादिल। वय्कया कथं पोखराया लागि ब्वःगु यू ६०१–९ एनएजेओ कलसाइनया विमान येँय् लिहाँवगु खः। उगु विमानया ककपिटय् कुँ वगु खनेदुगु खः।

ककपिटय् कुँ वसेलिं चालकं विमानयात येँय् डाइभर्ट याःगु खः। येँय् अवतरण यायेधुक्कां उगु विमान हाकनं यात्रु कयाः पोखरा ब्वःगु प्रवक्ता शेर्पां जानकारी बियादिल।

सोमबाः सुथय् विराटनगरया लागि ब्वःगु बुद्ध एयरया विमानया ल्याण्डिङ गेयर मचागुलिं विराटनगरय् अवतरण यायेमफुगु खः।  अवतरण यायेन्हय् त्रिभुवन विमानस्थलय्  दमकल, एम्बुलेन्स व उद्धारकर्मीतय्त तयारी अवस्थाय् तयातःगु खः। 

सर्गतय् १० चाहिलेधुक्काः उगु विमान येँय् लिहाँवगु खः। येँय्  अवतरण याःबलय् धासाः ल्याण्डिङ गेयर चागुलिं विमान सहज अवतरण याःगु खः। उगु विमान अवतरण याःगु भिडियो बुद्ध एयरं सार्वजनिक याःगु दु। उगु विमान यात्रुत तयाः हाकनं  विराटनगर ब्वःगु विमानस्थलया प्रवक्ता शेर्पां धयादिल ।