तस्विरय् बादेगांया बुरुवाः द्यःया जात्रा

तस्विरय् बादेगांया बुरुवाः द्यःया जात्रा


भदौ २१ - यलया नेवाः वस्ती बादेगामय् जुगः चःरे खुन्हु तःजिक जात्रा जुगु दु।गुंलागा चःरे आइतबाः बादेगामय् बुरूवाःद्यःया जात्रा जुगु खः।

विशेष याना अमिताभ तथागतया मूर्तियात खतय् तयाः कुबिया सांस्कृतिक बाजं थाना जात्रा याइगु खः । थुगु जात्रायात लिपांगु इलय् वया बुरुवाः द्यः जुगः जात्रा धायेगु यानाहःगु दु । बुरुवाः द्यःया जात्रा लिसें जुगः खुन्हु जुइगु जुया हे बुरुवाः द्यः जुगः जात्रा धाःगु खः ।

थुगु जात्रा झिंन्यासःदँ मल्याकं न्ह्यःनिसें न्ह्यानाच्वंगु जात्रा खः धकाः स्थानीय मनूतय्सं दावी याना वयाच्वंगु दु । दँय् दसं पंजरां खुन्हुया दिनय् लाका जात्रा यायेगु नाप नापं पंजरां बिइगु नं चलन दु । थुगु द्यःयात न्हापा न्हापा जूसा थीथी थासय् जुइगु सम्यकय् नं विज्याकिगुु चलन दुगु खः धकाः नं स्थानीयवासीतय्सं धाये याः ।

बादेगामय् बुधवाः पतिकं अनया बुरुवाः द्यःयाथाय् विशेष पुजा जुइसाः गुंला लच्छि ला झन विशेष कथंया मेला जुइगु खः । अथेहे मेला क्वचायेकेगु कथं नं बुरुवा द्यःया जात्रा जुगः चःह्रे खुन्हु याना वयाच्वंगु खः ।

बादेगांया थुगु जात्रा अनया मौलिक कथंया जात्रा जुयाच्वंगु दु । अथे हे मतया नं पिकायेगु याइ । स्थानीय फुक्क धाइथें त्वाःया नेवाःत जात्राय् ब्वति काईगु यानाच्वंगु दु ।

अथे हे जात्राया झ्वलय् स्थानीय लाखे नं पिकाइगु चलन दु । थीथी प्यंगू त्वाःया प्यम्ह हे लाखे पिकाइगु चलन दु । उगु हे कथं ख्यालः तकं पिकाइगु चलन दु ।