उपचारय् लापरबाही याःगु प्रमाणित जुसेलिं मुटुरोग विशेषज्ञ खत्रीयात कारबाही

उपचारय् लापरबाही याःगु प्रमाणित जुसेलिं  मुटुरोग विशेषज्ञ खत्रीयात कारबाही


साउन ८ - उपचारय् लापरवाही यागु कारण नेपाल वायुसेवा निगमया क्याप्टेन सिगु धासें डाक्टरयात कारबाही याःगु दु । निगमया बरिष्ठ क्याप्टेन राकेश जंगबहादुर राणाया उपचारय् लापरवाही जुया सिगु ठहर यासें नेपाल मेडिकल काउन्सिलं मुटुल्वय्  विशेषज्ञ डा.ऋषि खत्रीयात कारबाही याःगु खः । 

क्याप्टेन राणा २०७७ मसिंर १० गते हृदयघातया कारण सिगु खः । मंसिर ९ गते चान्हय् मलेसियाया उडानया लागि तयारी याना च्वंगु इलय् आकाझाकां मछिंगु  महसुस जुसेलिं राणायात ह्याम्स अस्पताल भर्ना याःगु खः । अस्पताल भर्ना याःगु कन्ह्य् खुन्हू वय्क मदुगु खः। 

राणाया उपचारय् संलग्न डा. खत्री व नागरिक उड्डयन प्राधिकरणया  नागरिक उड्डयन चिकित्सा निर्धारक डा.राजीवकुमार देउविरुद्ध उजुरी याःगु खः । क्याप्टेन राणाया जहान पुष्पा राणां वंगु चैत ४ गते मेडिकल काउन्सिलय् उजुरी बियादिगु खः । 

छानबिनलिपा उपचारय् लापरवाही खनेदुगु ठहर यासें काउन्सिलं डा. खत्रीयात कारबाही याःगु खः । काउन्सिलं वंगु साउन ४ गते उजुरीकर्ता पुष्पा राणायात पाै च्वयाः चिकित्सकयात कारबाही याःगु जानकारी ब्यूगु खः । चिकित्सक विरुद्धय् लाःगु उजुरी सम्बन्धय् छानबिन जूबलय् निजं चिकित्सकीय लापरवाही याःगु खनेदुगु काउन्सिलं छ्वगु पतिइ धयातगु दु। 

डा. खत्रीयात  सूचं जारी जूगु मितिइ दच्छितक मुटुल्वय् विज्ञया हैसियतं ज्या याये मबिइगु निर्णय जूगु काउन्सिलं धागु दु । दच्छिया  तालिम व थप सिकाइ याःगु प्रमाण पेश यासाः जक मुटुल्वय्या उपचार याकेत अनुमति बिइगु निर्णय नं काउन्सिलं याःगु दु । 

नेपाल नागरिक उड्ययन प्राधिकरणय् चिकित्सकया नियुक्ति व इमिगु जिम्मेवारी सम्बन्धय् नं थीथी व्यवस्था यायेत निगमयात इनाप यायेगु निर्णय काउन्सिलं याःगु दु।