छठया मुख्य दिं थौं, बीनिभाःयात पुज्यानाः अर्घ बिइगु

छठया मुख्य दिं थौं, बीनिभाःयात पुज्यानाः अर्घ बिइगु

मंसिर ५ - छठया मुख्य दिं थौं बीनिभाःयात पुज्यानाः अर्घ बिया हनिइ । थ्व नखया मुख्य दिं कछलाथ्व षष्ठी खुनु थौं कठोर निराहार अप्सं च्वनाः बहनि बीनिभाःयात पुज्यानाः अर्घ बीगु चलन दु ।

कछलाथ्व सप्तमी खुनु कन्हय् सुथय् लूनिभाःयात पुज्यानाः विधिपूर्वक अर्घ बिइधुंकाः थ्व नख क्वचाइ । कछलाथ्व चौथीनिसें सप्तमीतक हनीगु सूद्र्यःया आराधना, उपासना व पुज्याइगु थ्व नख म्हीगनिसें न्ह्याःगु खः। छठय् व्रत च्वंसा दुःख व दरिद्रतां मदइगु जनविश्वास दु । उकी झ्वः–झ्वः सि छायेबले सूद्र्यः लय्तायाः अप्सं च्वंपिनिगु सन्तानया नापं भिं जुइगु मान्यता दु । कछलाथ्व चौथी खुनु म्वःल्हुयाः छछाः नयाः अप्सं च्वनिइ । कन्हय् खुनु पञ्चमी खुनु साखः तयाः दयेकातःगु खीर षष्ठी मातायात छानाः भचा भचा अप्सं च्वंपिन्सं प्रसादकथं नइगु व चि मनसे छछाः फलाहार याइ । कार्तिक शुक्ल पक्षय् विधिपूर्वक सूर्द्यः पुज्यानाः अर्घ ब्यूसा छ्यंगू सम्बन्धी ल्वय् जुइमखु धइगु धार्मिक विश्वास दु ।

विसं २०४६ न्हय् तराइया सीमित क्षेत्रय् जक हनिगु छठं आः राष्ट्रिय स्वरुप ग्रहण याःगु दु।  छठ पर्वया लागि येँया गुह्येश्वरी, गहनापोखरी, कमलपोखरी, वागमती, नख्खु व विष्णुमती लगायत खुसि सिथय् समाः याइगुलिइ थुगुसिइ कोरोना महामारीया कारण प्रायः सुनसान दु । थौ बहनी गुह्येश्वरी व कमलपोखरीइ  राष्ट्रपति नं छठ पूजा यानादिगुलिइ थुगुसिइ कोरोना भाइरसया कारण स्थगित याःगु दु । अथेहे कोरोनापाखें बचे जुइत प्रशासनं भीड मयासें छठ हनेत आह्वान याःगु दु। स्वास्थ्य सुरक्षायाा विधि छ्यला व्रत विधि पूरा यायेत प्रशासनं इनाप यागु दु ।