गम्भीर लक्षणदुपिं संक्रमिततयत होम आइसोलेशनय् मच्वनेत डक्टरतयगु इनाप

गम्भीर लक्षणदुपिं संक्रमिततयत होम आइसोलेशनय् मच्वनेत डक्टरतयगु इनाप

मंसिर ६ - लक्षण खनेदुपिं कोरोना संक्रमित होम आइसोलेशनय् च्वनेबलय् गम्भीर समस्या जुइफू धासें डाक्टरतयसं लक्षण मदुसाः जक छेँय् च्वनेत सुझाव ब्यूगु दु।

थुथाय् कोरोनाया गम्भीर लक्षण खनेदुपिं नं छेँय् हे आइसोलेशनय् च्वनाच्वंगुलिइ सिइफुगु जोखिम अप्वगु सरुवा ल्वय् विषेशज्ञ डाक्टर अनुप बाँस्तोलां धयादिल । वयकया कथं लक्षण खनेमदुपिं, हल्का सेखंमुसु व सामान्य लक्षण दुपिं संक्रमित जक होम आइसोलेशनय् च्वनेमाः । गम्भीर लक्ष्ण खनेदुपिं बिरामीया स्वास्थ्यय् न्ह्यागु नं इलय् जटिल अवस्था वयेफुगुलिइ अस्पताल वनेमाःगु वयकया सुझाव दु । बिरामीयात आकाझाकां स्वास्थ्य समस्या खनेदया अस्पतालय् थ्यकेबलय् शैया मदइगु सम्भावना जुइगु डाक्टर बाँस्तोलाया धापू दु ।

थ्वहे कारण गुलिं विरामी अस्पतालय् शैया मांमां, अस्पतालतक यंकेत गाडी मांमां हे सिगु दु। अथेहे, गुलिखे बिरामीत धासाः कोरोनाया लक्ष्यण खनेदसाः नं १४,१५ न्हू आइसोलेशनय् च्वनेमाःलि धकाः पीसीआर टेस्ट हे मयाकुसें छेँय् च्वनाच्वगुलिइ नं समस्या जुगु डाक्टरतयसं धागु दु।

थुथाय् स्वनिगःया अस्पतालय् भर्ना जुपिं यक्वसित अक्सिजन माःगु व गम्भीर कथंया संक्रमितत जुगु नं  डाक्टर बाँस्तोलां धयादिल । अस्पतालया आइसियु आः नं जायाच्वगु वयकलं धयादिल । तर आइसोलेसन वार्डत धासाः खाली जुंजुं वनाच्वंगु दु।