कोरोनालिसें ल्वायेगु क्षमता अप्वयेकेत आदर्श सामाजिक सेवा समाजं गुर्जो इनाच्वन

कोरोनालिसें ल्वायेगु क्षमता अप्वयेकेत आदर्श सामाजिक सेवा समाजं गुर्जो इनाच्वन

असोज २२- स्वनिगलय् कोरोना भाइरसया अप्वया वसेलिइ ल्वयलिसें ल्वायेगु क्षमता अप्वयेकिगु जःनीखःनी (गुर्जो) वितरण  यायेगु ज्या जुयाच्वंगु दु।

मध्यपुर थिमिया आदर्श सामाजिक सेवा समाजं छेँय् छेँय् वना निःशुल्क जनीखनी (गुर्जो) वितरण  यायेगु ज्या यानाच्वंगु दु। शुरूइ थपिन्स कोरोना संक्रमिततयगु समस्या खना थ्व ज्या यानागु व लिपा  ‘छखाः छेँय् , छमाः गुर्जो’ अभियानकर्ता लहानया कर ज्याकुया प्रमुख कमलबहादुर राजलवटं नं ग्वाहालि यानादिगु धकाः सेवा समाजया अध्यक्ष रमेश प्रजापतिं धयादिल।

लकडाउन शुरू जुइन्हय् रमेश व वयकया पासापिं सेवा समाजया सचिब चन्द्रमान श्रेष्ठ, कोषाध्यक्ष जगत बहादुर श्रेष्ठ लगायतं ज्याथाज्याथिपिन्त सेवा विइगु ल्याखं आदर्श सामाजिक सेवा समाजं स्थापना यानादिल । तर नेपालय् कोरोना संक्रमण दुहावसेलिइ वयकपिन्स थ्व ज्या यायेमखन। वंगु चैत ११ नेपालय् लकडाउन लागू जुल। थुकिया लिपा वंगु चैत १७ गते वयकपिन्स थिमीया बासिन्दापिन्त राहत इनेगु ज्या यानादिल।

अनंलिपा कोरोनाया संक्रमण स्थानीय मनूतयत नं खनेदत।  थःगु वडा ५ य् न संक्रमितत लुयावसेलिइ विपन्न परिवारयात राहत इनेगु ज्याय् थंपि केन्दित जुयागु  रमेशं धयादिल।

अबले  राहत विइगु लागि सहकारी लगायतया संस्थापाखें आर्थिक ग्वाहालि वगु व वहे आर्थिक ग्वाहालिया धिबाः छु छुं ल्यदनिगुलिइ उकिया सदुपयोग यायेगु कथं गुर्जो इनेगु ज्या यानागु धकाः वयकं धयादिल। गुर्जो ईनेगु ज्याय् वयकपिन्त  लायकू भैलःया गुरु अर्जुन श्रेष्ठं ग्वाहालि यानाच्वनादिगु दु।

गुर्जो वितरण यायेगु लागि अभियानकर्ता राजलवटं वयकपिन्त निःशुल्क २५० किलोति गुर्जो बियादिल। " जिमिसं येँया इटुम्बहालय् गुर्जो न्याना इनाच्वनागु दु" रमेशं धयादिल।

सेवा समाजं मध्यपुर १० गू वडा दुगु थिमिन्यकं गुर्जो वितरण यायेगु लक्ष्य कयातगु दुसाः आःतक ७ गू वडाय् निशुल्क रूपं संक्रमित व संक्रमित मजुपिनिगु छेँय् छेँय् वना इनेधुक्कुगु दु। किलोया हिसाबय् धायेगु खसाः ६५० निसें ७०० किलोतक गुर्जो इनेधुक्कुगु दु।  

गुर्जो इनेगु बाहेक वयकपिन्सं वंगु आश्विन १६ गते कोरोना रोकथाम व नियन्त्रणय समुदायया भूमिकायात कया थिमीया फुक्कं सामाजिक संघ संस्थायात दुथ्याका भर्चुअल मिटिङ नं यानादिइ धुक्कुगु दु।

गुर्जोया प्रयोग

'छखाः छेँय्, छमाः गुर्जो’ अभियानकर्ता लहानया कर ज्याकुया प्रमुख कमलबहादुर राजलवटया कथं गुर्जोया प्रयोगं ल्वय लिसें ल्वायेगु क्षमता थकाइगु ज्या याइ। कोरोना भाइरसलगायत सेखं मुसु, फुक्क  कथंया  ज्वर, ग्याष्ट्रिक लनिगु, शरीरय् दुगु विकार पिकाइगु ज्या याइ। अथेहे गुर्जोया सेवनं मानसिकलिसें नशासम्बन्धी समस्या चिकिगु, पाचनप्रणालीयात बल्लाकिगु,हिंया कमीयात सन्तुलन याइगु, बाथ रोगया निर्मूल याइगु, प्वाः सम्बन्धी समस्या समाधान याइगु, श्वासप्रश्वाससम्बन्धी समस्या समाधान याइ।

अथेहे नियमित गुर्जो नलकि मिखाया विकार , कमजोरी चिकिगु छ्यगूलिसें स्वापू दुगु समस्या नं समाधान याइ। तर वयकया कथं गुर्जो मस्त व मचाबुपिन्स व रक्तचाप कम जुपिन्सं  धासा चिं तया नयेमाः ।

आदर्श सामाजिक सेवा समाजया अध्यक्ष रमेश प्रजापतिया कथं गुर्जोयात नेवाः भासं जःनीखःनी धाइ व गपः निनीबलय् वास कथं थुकिया प्रयोग यानाच्वंगु दु।

गुर्जोयात गथे याना नयेगु

किपाः रमेश प्रजापति