पूर्णिमा शाक्यया मतिनाया ख्वबि पिहाँवल

पूर्णिमा शाक्यया मतिनाया ख्वबि पिहाँवल


फागुन १५ - पूर्णिमा शाक्य पामिलाया नेपालभाषाया हाइकु मुना मतिनाया ख्वबि पिहाँवगु दु।

ईलोहं प्रकाशनपाखें पिकागु हाइकु मुनाया बागमती प्रदेशया सांसद शोभा शाक्य, प्रज्ञा प्रतिष्ठानया प्राज्ञ ध्रुव मधिकर्मी, ईलोहं प्रकाशनया प्रबन्ध निर्देशक नरेश वीर शाक्य, च्वसापासाया नायः भुषण प्रसाद श्रेष्ठ, नेपालभाषा मंकाः खलः यलया पूर्वनायः किरण शाक्य, नेवाः हाइकु ख्यःया कजि सुरेश प्रधानं शनिबाः यलया कनिबहालय् च्वंगु होटेल गुडिवलय् जुगु ज्याझ्वलय् मंकाःकथं मतिनाया ख्वबि पितब्वज्या यानादिगु खः।

ज्याझ्वलय् ईलोहं प्रकाशनया प्रमुख व्यवस्थापक दर्शनवीर शाक्यं ईलोहंपाखें पिहाँवगु सफूया बारेय् जानकारी बियादिगु खः। अथेहे बागमती प्रदेशया सांसद शाक्य, प्रज्ञा प्रतिष्ठानया प्राज्ञ मधिकर्मी, ईलोहंया प्रबन्ध निर्देशक शाक्य, च्वसापासाया नायः श्रेष्ठ, नेपालभाषा मंकाः खलः यलया पूर्व नायः किरण शाक्य, नेवाः हाइकु ख्यःया कजि प्रधानं पिहाँवगु सफूया समालोचना लिसें नेपालभाषाय् हाइकु लेखन, हाइकुया समालोचना लगायतया बारेय् थःथःगु धारणा तयादिगु खः।

ज्याझ्वलय् न्हूगु प्रयोगया रुपय् प्रकाशित कृतिया बारेय् च्वमि शाक्य व पत्रकार सिल्भिया राजोपाध्यायदथुइया खंल्हाबल्हा नं तगु खः। ज्याझ्वः सुनिल बज्राचार्यं न्ह्याकादिगु खः।

मतिनाया ख्वबिइ च्वमि शाक्यं च्वयादिगु १३० पू हाइकु दुथ्याकाःतगु दुसाः नेवाः हाइकु ख्यः नं सफू वितरण यायेगु भाला कयातगु दु।