ज्यापू समाजपाखें नेपालमण्डल टेलिभिजन व  ललितपुर उद्योग वाणिज्य संघया ज्यासना पुचयात लसकुस

ज्यापू समाजपाखें नेपालमण्डल टेलिभिजन व  ललितपुर उद्योग वाणिज्य संघया ज्यासना पुचयात लसकुस

माघ २२ - ज्यापू समाज यलं नेपालमण्डल टेलिभिजन व  ललितपुर उद्योग वाणिज्य संघया नवनिर्वाचित ज्यासना पुचयात लसकुस लिसें बधाइ ज्याझ्वः यागु दु।

ज्यापू समाज यलया अध्यक्ष चन्द्रलाल महर्जनया सभापतित्वय् बुधबाः ज्यापू प्रज्ञा भवन भोलध्वाखाय् जुगु ज्याझ्वलय् ज्यापू समाजं नेपालमण्डल टेलिभिजन व  ललितपुर उद्योग वाणिज्य संघया नवनिर्वाचित ज्यासना पुचयात नेवाः परम्परा कथं संग बिया लसकुस लिसें बधाइ ब्यूगु खः।

ज्यापू समाज यलया अध्यक्ष चन्द्रलाल महर्जनं समाजं यलया थीथी संघसस्थालिसें समन्वय व सहकार्य याना न्ह्यावनाच्वंगु धासें नेपाल भाषा मंका खलः यललिसें १९ जातिय पुचलं नेवाः कला सम्पदा,संस्कृतिया थपू यायेगु निति बृहत रूपं याकनं हे ज्याझ्वः यायेगु निर्णय जुगु धयादिल।

ज्याझ्वलय् लसकुस न्वचु बिसें समाजया वरिष्ठ न्वकु सन्तमान महर्जनं ज्यापू समाजं यानावयाच्वगु ज्याखँया बारे जानकारी बियादिगु खः।   

ज्याझ्वलय् नेपालमण्डल टेलिभिजनया अध्यक्ष रमेश महर्जनं नेपालमण्डलं न्हूगु न्हूगु ज्याझ्वःया खाका दयेकाच्वगु धासें फुक्कसित थःथगु ठासं नेपालमण्डल टेलिभिजनं छ्यलेत इनाप यानादिल।

अथेहे ज्याझ्वलय्  ललितपुर उद्योग वाणिज्य संघया अध्यक्ष मनोज बहादुर न्याछ्योँ नं थःगु कार्यकालय् यलय् दुगु संघसंसथालिसें सहकार्य याना व्यवसायीतयगु हकहितया लागि ज्या यानावनेगु प्रतिवद्धता प्वकादिल।

ज्याझ्वलय् नेपालमण्डल टेलिभिजनया अध्यक्ष रमेश महर्जनलिसें बोर्डया दुजत पद्मज्योति कंसाकार, ध्रुवकुमार श्रेष्ठ, दिपक श्रेष्ठ, मंगल महर्जन, कुमारराजा महर्जन, सिल्भिया राजोपाध्याय्, शर्मिला महर्जन व नातिभाइ महर्जनयात संग बिया कार्यकाल बालायेमाः धकाः ज्यापू समाज यलं भिंतुना देछागु खः।

अथेहे ज्याझ्वलय् नेपाल उद्योग वाणिज्य महासंघया दुज कृष्णलाल महर्जनलिसें ललितपुर उद्योग वाणिज्य संघया अध्यक्ष मनोज बहादुर न्याछ्योँ, वरिष्ठ उपाध्यक्ष विश्वराज बज्राचार्य , उद्योग उपाध्यक्ष सुसन महर्जन, वाणिज्य उपाध्यक्ष उसन बज्राचार्य, संस्थागत उपाध्यक्ष विरेन्द्र लाल श्रेष्ठ, महासचिव रूपकमान महर्जन, कोषाध्यक्ष भूमिनन्दन कमाचार्य, दुजत रूपेन्द्र राज शाक्य, राजेश राज बज्राचार्य, मिलन शाक्य, आपुलाल अवाले, मुकुन्द महर्जन, सुजन बज्राचार्य, राजु महर्जन, महेश श्रेष्ठ, गुनकेशरी ताम्राकार, रमेश महर्जन,शर्मिला श्रेष्ठ, सजना श्रेष्ठ, विमला शाक्य,पूर्ण महर्जन व नविनमान श्रेष्ठयात नं संग बिया कार्यकाल बालामाः धकाः ज्यापू समाज यलं भिंतुना देछागु खः।

लसकुसलिसें बधाइ ज्याझ्वलय् ज्यापू समाज यलया पूर्व अध्यक्षत रामकाजी अवाले, विरसिहं महर्जन, कुललाल डंगोल, यल महानगरपालिकाया प्रवक्तालिसें  वडा ल्याः ९ या अध्यक्ष राजु महर्जन, वडा ल्याः १२ या अध्यक्ष नारायण अवाले, ज्यापू समाजया सल्लाहकार परिषदया दुजत, पदाधिकारीतयगु उपस्थिति दुगु खःसा ज्याझ्वः ज्यापू समाज यलया छयाञ्जे सरिता महर्जनं न्ह्याकादिगु खः।

ज्यापू समाजं थःलिसें सहकार्य दुगु संघसंस्थाय् न्हूपि पदाधिकारीत वइबलय् नेवाः परम्परा कथं संग बिया लसकुसलिसें भिन्तुना देछायेगु यानावयाच्वगु दु।

फोटो: ज्यापू समाज यल