कमलपोखरीया जमिन १ इन्च नं पाः जुगु मदु - मेयर शाक्य

कमलपोखरीया जमिन १ इन्च नं पाः जुगु मदु -  मेयर शाक्य

माघ ८ - येँय् महानगरपालिकाया प्रमुख विद्या सुन्दर शाक्यं पलेस्वां पुखु, कमलपोखरी पुर्ननिर्माणया सन्दर्भय् याकनं पत्रकार सम्मेलन याना यथार्थ जानकारी बिइगु धयादिगु दु।

बुधबाः महानगरपालिका नगरसभाया ८ क्वःगु अधिवेशनयात सम्वोधन यासें वयकलं कमलपोखरीया जमिन १ इन्च नं पाः जुगु मदु धयादिल। वयकया कथं पुर्ननिर्माणया झ्वलय् ५ रोपनी क्षेत्रफलति दुगु महानगरीय प्रहरी वृत्त कमलपोखरीयात मेथाय् यंकुगुलिइ कमलपोखरी जःखया लागा स्वतः अप्वगु दु।

महानगरपालिकां तयार यागःगु ड्रोइङ–डिजाइन, यायेत्यगु ज्या लगायतया बारेय् फुक्कं बस्तुस्थितिबारे  याकनं पत्रकार सम्मेलन याना जानकारी बिइगु धासें वयकलं ज्याया सिलसिलाय् ठेकेदार कम्पनीइ मखुगु यागु दुसाः उकिया नं सत्यतथ्य जानकारी बिइगु धयादिल।

वयकलं कमलपोखरीया ड्रोइङ डिजाइन अनया तत्कालीन संघीय सांसद गगन थापा, प्रदेश सांसद, अनया पुलांपिं विज्ञ, जेष्ठ नागरिक, स्थानीय संघ–संस्था फुक्कंलिसें तकमछि सहलह याना फुक्कसिगु सहमतिइ पुर्ननिर्माणया ज्या न्ह्यागु धयादिल।

बास्तुविदतलिसें नं तकमछि सहलह यानाः वयकपिनिगु सुझाव कथं हे ज्या न्ह्याकागु धासें मेयर शाक्यं वया थीथी कथंया खँ न्हयथना आःवया पंग थनेगु ज्या जुयाच्वंगुलिइ थुकिइ महानगरया ध्यानाकर्षण जुगु धयादिल।

मेयर शाक्यं पुरातत्व विभागं निर्माण ज्या दिकिगु धकाः आदेश ब्यूसाः नं महानगरपालिकां पालना मयागु धासें समाचार वयाच्वगु धासें वयकलं थ्वप्रति नं ध्यानाकर्षण जुगु धयादिल। आः थीथी संचारमाध्यमय् कमलपोखरी मिचे जुल, अन कंक्रिटया प्रयोग याना सम्पदा न्हकेगु ज्या जुल धकाः समाचार वयाच्वगु धासें सञ्चारमाध्यमय् वंथें कमलपोखरीया जमिन १ इन्च नं पाः मजुगु वयकलं दाबी यानादिल।

महानगरं अन प्यकुनय् मौलिकता क्यनिगु कथं सम्पदाया नं संरक्षण याना कला व संस्कृतियात स्वाइगु ४ गू मन्द दयेकेत्यनागु धासें वयकलं महानगरं सम्पदा न्ह्कल धकाः प्रचारय् वगु व वयकपिपिन्स धागु थें कंक्रिट हे कंक्रिट मजुसें मौलिकतायात ल्यकां निर्माण यायेत्यनागु धकाः वयकलं धयादिल। अन छुं न कमजोरी जुगु दुसाः उकियात सहलह याना समाधान यायेत तयार जुगु वयकलं धयादिल।

थ्वहे दथुइ, महानगरपालिकाया ८ क्वःगुं अधिवेशन क्वचागु दु। पुष २७ गते न्हापांगु बैठकं सुरु जुगु अधिवेशन  ३ गू विधेयक व लेखा समितिया प्रतिवेदन पारित याना क्वःचागु खः। अधिवेशनपाखें थीथी ज्याझवलय् बजेट संशोधन यागु दु। अधिवेशनपाखें ‘येँय्ं महानगरपालिका वातावरण तथा प्राकृतिक स्रोतया संरक्षण यायेत दयेकुगु विधेयक ‘येँय्ं महानगरपालिका बजार व्यवस्थापन तथा अनुगमन विधेयक व ‘येँय्ं महानगरपालिका संस्था दर्ता व नियमन सम्बन्धी विधेयक — २०७७’ स्वीकृत जुगु दु।

अथेहे सभापाखें लेखा समितिया प्रतिवेदन पारित जुगु दु। समितिइ प्रतिवेदनय् वित्तिय सुशासन, नियमितता, मितव्ययिता, कार्यदक्षता, पारदर्शिता, प्रभावकारिताया विषय दुथ्याकातगु दु। सभाय् समितिया कजि ध्रुव त्रिपाठीइ प्रतिवेदन प्रस्तुत यानादिगु खः ।