नृसिंह अवतारनापं थुगुसिया कात्तिप्याखं क्वचाल

नृसिंह अवतारनापं थुगुसिया कात्तिप्याखं क्वचाल

मंसिर १४ - थुगुसिया कात्ति प्याखं शनिबाः नृसिंह अवतार क्यना क्वचागु दु।

थगुने नगुने १२ न्हूतक क्यगु प्याखं थुगुसिइ कोरोना महामारीया कारण शुक्रबाः व शनिबाः २ न्हू जक क्यंगु खः। प्याखनय् नारान्द्य:या अवतार नृसिहं हिरण्यकश्यपुयात स्या:गु पौराणिक बाखंयात न्ह्यब्वइगु खः। प्याखनय् नृसिंह जुया: राजोपाध्याय समुदायया कलाकारं म्हिता वयाच्वंगु दु सा दैत्यराज जुया: यलय् नुग:त्वा:या चित्रकार समुदायं म्हितिगु चलन दु। हिरण्यकशपुया बध लिपा अप्सरातयसं नृसिंहया क्रोध शान्त्त याइगु प्याखं नं न्ह्यब्वगु खः।

अनलिपां नृसिंहया पूजा याना कात्ति प्याखं क्वचागु खः।  वराह अवतार क्यंगु ख:। नारान्द्यवं वराह अवतार कया: दैत्यराज हिरण्याक्षयात स्या:गु लू क्यंगु ख:।

३७९ दँ न्हय् निसें मदिक्क क्यनावयाच्वगुलिइ परम्परायात कायम यायेत थुगुसिइ कोरोनाया जोखिमया दथुइ थुगु प्याखं २ न्हू जुसाः नं क्यनेगु निर्णय जुगु खः । कोरोना सङक्रमण जोखिमयाा कारण प्याखंनय् १८ दँ क्यययापिं व ६० दँ च्वय् यापिं कलाकारत दुथ्याकातगु मदु।

निन्हू्या प्याखं यल लायकुयात सिल याना मजिमगाःपिं कलाकार जक च्वना नेपालमण्डल टेलिभिजन, नेपालमण्डल टेलिभिजनया अफिसियल फेसबुक पेज व यूट्यूब, कात्तिक नाच संरक्षण समितिपाखें संचालन यानाच्वंगु झीगु कार्तिक नाच फेसबुक पेजपाखें प्याखं क्यंगु खः।

नेपाल सम्वत् न्हयस: व खुइछदँय् जुजु सिद्धिनर्सिंह मल्लं न्ह्याकावंगु कात्तीप्याखं उबलेंनिसें आ:तक मद्दिक न्ह्यानावयाच्वंगु दु। थुगु प्याखं  अबलें ५ न्हू व जुजु सिद्धिनरसिंह मल्लया काय् जुगु श्रीनिवासया पालंनिसें ‘बाथःप्याखँ’, ‘सुदामा प्याखँ’ व ‘सुरदास प्याखँ’ थप याना १५ न्हू क्यगु खः।

अथेहे जुजु श्रीनिवासया काय् योगनरेन्द्र मल्लं ‘उषाहरण’ व ‘माधव लिला’ निगू लिला थप याना कार्तिक ज्वछि २७ न्हू सञ्चालन यागु खःसाः अनलिपां थुगु प्याखंनय् १७ विधाया बाखं थप याना क्यंगु खः।