यःसिं क्वथला येँन्याः नखः थौ क्वचाइगु

यःसिं क्वथला  येँन्याः नखः थौ क्वचाइगु


असोज ८ - छवाः न्हय् येँया हनुमानध्वाकाय् यःसिं थनाः न्ह्याःगु येँन्याः थौं यःसिं क्वथयाः क्वचायेत्यंगु दु ।

हन्चा बहनी १०ः३६  मीनेटया साइतय् साय्मि खलःया नेतृत्वय् यःसिं क्वथइगु केन्द्रिय मानन्धर संघं धागु दु। क्वथयेधुंकाः यःसिंयात टेकुइ वाये यंकीगु परम्परा दु । तर यःसिंलिसें येँया सुरक्षाया लागि च्यागु कुनय् थनातःइगु लाकासि धाःसा आकिवंया जात्राया निंतिं ल्यंका तइ।

थ्वहे झ्वलय् येँन्याःया थौं लिपांगु न्हि, कुमारीया रथ मिस्तय्सं सालेत्यंगु दु । छुदँ न्ह्योनिसें थौंया दिनय् कुमारीया रथ मिस्तयसं सालेगु याःगु खः । थौं मिसातय्सं कुमारी लिसें गणेद्यः, भैरबया रथयात येँया दथुत्वालय् सालिगु खः। थौं बसन्तपू, प्याफः, न्यत, किलागः, थाय्मरुं सालाः कुमारी छेँय् हे लित हइगु येँन्याः व्यवस्थापन समितिं धाःगु दु ।

अथेहे थौं हे छवाःया लागि चायेकूगु श्वेत भैरवया लुखा नं तिइगु पराम्परा दु धासाः जात्राया लागि थीथी ठासय् वगु पुलुकिसी, लाखे, सवः भकु, लगायतया द्यः गण थौ थःथगु ठासय् लिहाँविज्याइ।अथेहे थौ राष्ट्रप्रमुखं कुमारीया ल्हातं सिन्ह तिइगु परम्परा दु ।