८ दँनिसें दिनाच्वंगु किराँतकालीन नागेंचा प्याखं न्ह्याःत

८ दँनिसें दिनाच्वंगु किराँतकालीन नागेंचा प्याखं न्ह्याःत
किपाः गुरू राजेन्द्र


असोज ५ - आर्थिक अभावया कारणं २०७० सालनिसें दिनाच्वंगु किराँतकालीन नागेंचा प्याखँ हाकनं सञ्चालन जूगु दु। दिनाच्वंगु प्याखं संचालन यायेत येँय् महानगरया अनुदानलिसें सरोकारवाला समुदायतयगु विशेष अग्रसरताय् थुगुसिइ संचालन जूगु खः।

येँय् महानगरपालिका–७ चारूमती विहारय् २०७० सालय् प्रदर्शन जूगु प्याखं अनंलिपा म्हिगः चारुमती विहारय् क्यगु खः। महानगरपालिकाया प्रमुख विद्यासुन्दर शाक्यं प्याखनय् थाइगु बाजंत गुठीयारतय्त लःहाना प्याखं शुरू यानादीगु खः। प्याखं ल्हुइ न्हय्  म्हिगः नास द्यःया पूजा याःगु खः।

दँय् दसं यँन्या पुन्हीनिसें सुरू जुयाः ३ न्हूतक चावहिल, ग्वल लगायतया ९ ठासय् प्याखं क्यनिगु परम्परा दु।

नागेँचा प्याखँ संरक्षण समितिया अध्यक्ष जलद वैद्यया कथं  थाैं नं थ्व प्याखं सनिलया ६ः३० ताः पाखें जयबागेश्वरी देगलय् ल्हुइकिइ। वयकया कथं स्वन्हूतक क्यनेमाःगु जुसाः नं कोरोना भाइरसया संक्रमणया जोखिमया कारणं थुगुसिइ थ्व प्याखं निन्हू जक क्यनेत्यगु खः।

महाद्यः व पार्वतीया मतिनाया बाखंनय् आधारित थ्व प्याखं येँया पुलां बस्ती ग्वल पशुपति लागाय् हुइकेगु यानाच्वंगु खः।