नेपालमण्डल टेलिभिजनया नव निर्वाचित संचालक समितिया म्हसिका लिसे लसकुस ज्याझ्वः (फोटो फिचर)

नेपालमण्डल टेलिभिजनया नव निर्वाचित संचालक समितिया म्हसिका लिसे लसकुस ज्याझ्वः (फोटो फिचर)

माघ २ - जि,छि व झि धइगु भावना तया ज्या यायेफतसाः धासाः समुदाय न्ह्यने न्ह्यावनेत तालाइगु खँय् बःबिसें थःगु भाय् कला संस्कृति संरक्षणया लागि सकले जायेत शिक्षा विज्ञान तथा प्रविधि मन्त्री कृष्णगोपाल श्रेष्ठं आव्हान यानादिगु दु। नेपालमण्डल टेलिभिजनया अध्यक्ष रमेश महर्जनया सभानाय्स्वीगु शनिबाः यलया ज्यापू प्रज्ञा भवनय् जुगु  नव निर्वाचित संचालक समितिया म्हसिका लिसे लसकुस ज्याझ्वलय् मूपाहाँया आसनं नवायेगु झ्वलय् थथे धयादिगु खः।

ज्याझ्वलय् वयकलं नेवाःभाय् कला संस्कृतिया प्रचारप्रसार याना नेपालमण्डल टेलिभिजनं म्हितावयाच्वगु भूमिकायात च्वछासें न्हूगु संचालक समितिया भिन्तुना देछानादिगु खः।

नेपालमण्डल टेलिभिजनया अध्यक्ष रमेश महर्जनया नेपाल मण्डल टेलिभिजनयात थनतक थ्यकेत ग्वाहालि यानादिपिं सकसित सुभाय् देछासे वइगु दिंनय् नेवाः भाय् कला संस्कृति सम्पदा संरक्षणया लागि फुक्कलिसें सहकार्य याना न्हयावनेत तयार दु धासें सहकार्य यायेगु लागि आव्हान यानादिल।

अथेहे ज्याझ्वलय् बाङ्मय शताब्दीपुरूष महाविद्यावारिधि डा सत्यमोहन जोशीं अडियो भिन्तुना हसना मार्फत नेपालमण्डल टेलिभिजन वइगु दिनय् मचा साहित्यया ज्याझ्वः उत्पादन याना प्रशारण यायेमाःगुलिइ बः बियादिल।

अथेहे विशिष्ट पाहाँ काठमाण्डौ उपत्यका मेयर फोरमया उपाध्यक्षलिसें यल महानगरपालिकाया मेयर चिरीबाबु महर्जनं यल महानगरं मूर्त व अमूर्त सम्पदा संरक्षणया लागि यानावयाच्वगु ज्याया बारेय् जानकारी बिसें नेपालमण्डल टेलिभिजनलिसें थप सहकार्य याना न्हयावनेगु धकाः धयादिल।

अथेहे विशिष्ट पाहाँ टोखा नगरपालिकाया उपमेयर ज्ञानमाया डंगोलं नं टोखा नगरपालिकाय् संस्कृति संरक्षित लागा घोषणा याना अनया चाकु थज्यागु टोखाया पहिचान बिइगु ज्या खँ जुयाच्वगु धासें थज्यागु पहिचान बिइगु ज्याखँया प्रचारप्रसार यायेगु लागि नेपालमण्डल टेलिभिजनं तधंगु भूमिका म्हिताच्वगु धयादिल।

ज्याभ्वलय् न्हूगु संचालक समितियाप्रतिनिधित्व यासें उद्योगपति पद्म ज्योति कंसाकारं नेवा भाय् कला संस्कति लगायतया संरक्षण लागि तधंगु योगदान बियाच्वगु नेपालमण्डल टेलिभिजनय् थःपिं नं संलग्न जुइखंगुलिइ गाैरन्वावित जुगु धारणा तयादिल।

ज्याझ्वलय् ललितपुर प्रहरी प्रमुख एसएसपी किरण बज्राचार्य, ललितपुर उद्योग वाणिज्य संघया नव निवार्चित अध्यक्ष मनोज बहादुर न्याछ्यो, महासचिव रूपकमान महर्जन, ललितपुर उद्योग वाणिज्य संघया पूर्व अध्ययपि कृष्णलाल महर्जन, अजरमान जोशी, थ्रिस्टार क्लबया अध्यक्ष अरूणमान जोशी, नेपालभाषा मंका खल यलया नाय ऋषिप्रसाद श्रेष्ठ, यलया १९ जातिय समाजया नाय्पिंलिसें प्रतिनिधित, साउथ एसियन एसएमइ फोरमया नाय शुरेश प्रधान, ललितपुर नगर प्रहरीबलया प्रमुख सिताराम हाछेथु, टेवाया अध्यक्ष मीरा ज्योति, रावि डायमण्डया न्वकु सरिता महर्जन, पूर्व राष्ट्रिय योजना अायोगया दुज डा पुष्पराज राजकर्णिकार, ललितपुर संस्कृति संरक्षण समाजया नाय् बदन न्याछ्यों,पाटन सीविअारया म्यानेजिड्ग डाइरेक्टर लुनिभा चित्रकार, टिचिङ्ग हस्पितलया अाइसियू विभागया प्रमुख प्राध्यापक डा योगेन्द्रमान शाक्य लगायतया ब्वति दुगु खः।

अथेहे  नेपालमण्डल टेलिभिजनया सल्लाहकार रामकाजी अवाले, पूर्व  अध्यक्ष कुमार महर्जन, संस्थापक दुजलिसें कार्यक्रम लिसें प्राविधिक प्रमुख जितेन्द्र महर्जन पूर्व प्रबन्धलिसें सस्थापक दुज  निदेर्शक प्रकाश काजी डंगोल, सस्थापक दुजपिं रमेश  डंगोल, सैनिकराज सिहं, सन्देश महर्जन, नेपालमण्डल टेलिभिजनयात स्थापनाकालं निसें ग्वाहालि यानाच्वनादिम्ह चन्द्र महर्जन, ज्यापू समाजया पूर्व नाय्पिं, पदाधिकारीपिं, समाजया उल्लेखनीय योगदान यानादिपिं व्यक्तित्व,पत्रकार,  कर्मचारी, स्काउट, नगर प्रहरी लगायतया उपस्थिति दुगु खः।

न्हूगु संचालक समितिया अध्यक्ष रमेश महर्जन, दुजत ज्योति ग्रुपया अध्यक्ष पद्म ज्योति कंसाकार, पंचकन्या ग्रुपया उपध्यक्ष  ध्रुवकुमार श्रेष्ठ, नेपाटप अर्गनाइजेशनया अध्यक्ष दिपक श्रेष्ठ लिसें मंगल महर्जन,कुमार राजा महर्जन, सिल्भिया राजोपाध्याय्, नातिभाइ महर्जन व शर्मिला महर्जनयात निवार्चन समितिया रोशन बजिमय, सुरेन्द्र श्रेष्ठ व सानु डंगोल दसिपौ लल्हानादिगु खः।

ज्याझ्वलय् नेपाया राष्ट्रिय गानलिसे नेवाः राज्यया मे हायेका सम्मान व्यक्त यागु खः। ज्याझ्वलय् संचालक समितिया दुज मंगल महर्जनं नेपालमण्डल टेलिभिजनया स्थापनाकालया खँ कुलादिसे सुभाय् देछानादिगु खः।

ज्याझ्वलय् शिक्षा,विज्ञान तथा प्रविधि मन्त्री कृष्णगोपाल श्रेष्ठयात अध्यक्ष महर्जनं मतिनाया चिं लःल्हानादिगु खः।

औपचारिक ज्याझवः लिपा पाहाँपिन्त ज्यापू म्यूजियमया अवलोकन नं याकुगु खः।