फागुन २० गतेदुने कोभिशिल्ड न्याना नेपाल हइगु

फागुन २० गतेदुने कोभिशिल्ड  न्याना नेपाल हइगु

फागुन ६ - नेपालय् फागुन २० गतेदुने भारतं कोरोना विरुद्धया खोप कोभिशिल्ड न्याना हइगु जुगु दु।

स्वास्थ्य तथा जनसंख्या मन्त्री हृदयेश त्रिपाठीइ मन्त्रालयय् बिहिबाः पत्रकार सम्मेलन याना थथे जानकारी बियादिगु खः। 

सम्मेलनय् मन्त्री त्रिपाठीइ खोप न्यायेगु लागि आवश्यक प्रक्रिया न्ह्यावंगु व खोप न्यायेत भारतया सेरम इन्स्टिच्युटयात अग्रिम रकम बिइधुनागु धयादिल। 

अथेहे मन्त्री त्रिपाठीइ निजी कम्पनीयात नं कोरोना खोप हयेबिइत तयारी जुगु जानकारी बियादिल। निजी क्षेत्रयात कोरोना खोप न्यायेत अनुमति ब्यूसाः नं उगु खोप निजी कम्पनीतलिसें सरकारं धासाः मन्याइगु धयादिल।  

स्वास्थ्य मन्त्रालयं सेरमं उत्पादन याःगु कोभिसिल्ड खोप २० लख मात्रा न्यायेत्यगु खः । नेपालय् वइगु फागुन २३ गतेनिसें निगूगु चरणया खोप अभियान न्ह्यानाच्वंगु दु। उगु अभियानय् ६० दँसिबें च्वय् यापिं मनूतयत  खोप बिइगु जुगु दु। 

थुथाय् न्हापांगु चरणया निगूगु प्राथमिकताय् लापिन्त खोप बियाच्वंगु दु। सरकारी कर्मचारी, बैंकया कर्मचारी, जनप्रतिनिधि लगायतया मनूतयत बियाच्वगु दु। निगूगु प्राथमिकताया मनूतयत फागुन ८ तक खोप बिइ।

नेपालय् माघ १४ गतेनिसें खोप अभियान सुरु जुगु खः। अभियानया सुरुवातय् स्वास्थ्यकर्मी, सफाइकर्मी, एम्बुलेन्स चालक, शव व्यवस्थापक लगायतयात खोप बिइगु जुगु दु। आःतक नेपालय् २ लख ६३ द्वःलं मल्याक मनूतयत खोप बिइधुक्कुंगु दु। तर सुयात नं कडा किसिमया असर धासाः खनेदुगु मदु।