फोन लोनय् आकर्षण अप्वल, १०० न्हूलय् १००० म्हसिया काल त्यासा

फोन लोनय् आकर्षण अप्वल, १०० न्हूलय् १००० म्हसिया काल त्यासा

फागुन १० - छेँय् खर्चया लागि वा छुं नं व्यावसायिक ज्याया लागि बैंक व वित्तीय संस्थाय् वनेमाःगु बाध्यताया अन्त्य जुगु दु।

छगू कल फोन याःगु भरय् हे त्यासा कायेफइगु सुविधा विस्तार जुजु वनाच्वंगु दु। फोनपाखें त्यासा कायेगु सुविधाप्रति आकर्षण नं अप्वगु दु। आःतक नबिल बैंक, लक्ष्मी बैंक व कुमारी बैंकं फोनपाखें त्यासा कायेफइगु सुुविधा ब्यूगु दु। नेपालय् न्हापांखुसि शुरु जुगु फोन लोनमार्फत १०० न्हूलय् कूल १००० म्हसियां त्यासा कागु दु। निजी क्षेत्रया सेवाप्रदायक एफवान सफ्टं विकास याःगु फोन लोन सुविधाय् बैंकिङ व कर्पोरेट क्षेत्रय् ज्या याइपिं व्यक्तिइ आकर्षण खनेदुगु खः ।

बैंकय् खाता दुपिं मनूतयसं आवश्यकताकथं त्यासाः मोबाइलपाखें कायेफइ । बैंकय् नियमित कारोवार यागु व क्रेडिट हिस्ट्री बालापिं ग्राहकतयत थज्याःगु सुविधा ब्यूगु सम्बन्धित बैंकं धागु दु। बैंकं २ लख तकातक त्यासा बिइगु यानाच्वंगु दु। बंैकय् खाता दुपिन्सं थःगु मोबाइल बैंकिङमार्फत निवेदन ब्यूगु छुं मिनेटय् हे ग्राहकया खाताय् त्यासा उपलब्ध जुइ । थुकिया लागि बैंंकतक वनेमाःगु व बर तयेमाःगु झन्झट न ंदइमखु । त्यासा कायेत इच्छुक ग्राहकं छुं नं कागजी प्रक्रिया म्वायेकं हे थःगु मोबाइल  बैंक एपया प्रयोग याना त्यासा कायेत निवेदन बिइफइ।

विनाधितो, विनाकागजी प्रक्रिया छक्कल त्यासा कायेफइगुलिइ थुकिइ आकर्षण तसकं अप्वगु एफवान सफ्टया प्रमुख कार्यकारी अधिकृत सुवास शर्मां धयादिल। एफवान सफ्ट नेपालया डिजिटल वित्तीय सेवा कम्पनी खः। कम्पनीइ वित्तीय क्षेत्रय् आवश्यक जुगु फुक्कं कथंया प्रविधिया निर्माण याःगु खः।

अथेहे एफवान सफ्टं इसेवा व फोनपे थज्याःगु मोबाइलमार्फत जुइगु भुक्तानीया विकास याःगु दाबी याःगु दु ।