धुलिखेलय् प्रादेशिक जनस्वास्थ्य प्रयोगशाला प्रयोगय् वल

दैनिक ५०० लं मल्याकसिगु कोरोना परीक्षण जुइगु

धुलिखेलय् प्रादेशिक जनस्वास्थ्य प्रयोगशाला प्रयोगय्  वल
तस्विर: अशोक ब्याञ्जू /धुलिखेल नगरपालिकाया प्रमुख

भदौ ७ - काभ्रेपलाञ्चोकया धुलिखेलय् प्रादेशिक जनस्वास्थ्य प्रयोगशाला प्रयोगय् वगु दु ।

प्रादेशिक जनस्वास्थ्य ज्याकुया निमित्त जनस्वास्थ्य निर्देशक नारायण कार्कीं म्हिगःनिसें  कोरोना परीक्षण मेशिन संचालनय् वगु धयादिल । काभ्रे, सिन्धुपाल्चोक, दोलखा, रामेछाप, सिन्धुली व ख्वप जिल्लायात दुथ्याकेगु याना स्थापना जुगु प्रयोगशालाय् दैनिक ५०० लं मल्याकसिगु कोरोना परीक्षण यायेफइगु निमित्त निर्देशक कार्कीइ धयादिल । प्रयोगशालाय् ७ म्ह स्वास्थ्यकर्मी व ल्याव टेक्निसियन दु । मेशिन सञ्चालनय् वगुलिइ थनिनिसें स्वाब परीक्षणया लागि नमूना सङ्कलन जुइगु वयकलं धयादिल ।

वाग्मती प्रदेशया राजधानी हेटाैडा जुसाः नं प्रादेशिक केन्द्रीय प्रयोगशाला धुलिखेलय् स्थापना जुगु वयकलं धयादिल। प्रयोगशालाया निरिक्षण यार्सें वाग्मती प्रदेशया सामाजिक विकासमन्त्री युवराज दुलालं कोरोना जक मजुसें मेमेगु ल्वयया परीक्षण व पहिचान यायेफइगु याना ज्या जुयाच्वंगु धयादिल ।

धुलिखेल नगरपालिकाया प्रमुख अशोक ब्याञ्जूं जनस्वास्थ्य प्रयोगशालाया लागि नगरपालिकां भवनया व्यवस्थापन यागु व ल्यदनिगु पूर्वाधार नगरपालिका व प्रदेश सरकारया साझेदारीइ जुगु धयादिल ।