रूद्रायणी देगः पुनःनिर्माण जुइगु

रूद्रायणी देगः पुनःनिर्माण जुइगु


भदाै २३  - यल महानगरपालिका वडा ल्याः २१ खोनाया रूद्रायणी देगः पुनर्निर्माण जुइगु जूगु दु। २०७२ सालया भ्वखाचं क्षति जूगु रूद्रायणी देगः  पुनःनिर्माण यायेत बुधबाः छगू ज्याझ्वःया दथुइ उर्जा तथा जलश्रोत सिचाइ मन्त्री पम्फा भूसालं जग शिलान्यासः यानादिगु खः।

जगः शिलान्यास ज्याझ्वलय् मन्त्री भुसालनापं यल महानगरपालिकाया मेयर चिरीबाबु महर्जन, उपमेयर  गिता सत्याल, ललितपुर जिल्ला प्रशासन प्रमुख ढुण्डी प्रसाद निरला, वडा ल्याः २१ या अध्यक्ष रविन्द्र महर्जन, नेपालमण्डल टेलिभिजनया अध्यक्ष रमेश महर्जन, देगः पुनःनिर्माण उपभोक्ता समितिया अध्यक्ष बेखनहर महर्जनलगायतया उपस्थिति दुगु खः।

देगः पुनर्निर्माणया लागत ६ करोड तकातिया अनुमान याःगु दुसाः लिपा फिनिसङ्ग क्वःचाइबलय्  ७ करोड तकाति तुइगु वडा ल्या २१ या अध्यक्ष रविन्द्र महर्जनं धयादिल। देगः पुनःनिर्माणया लागि यल महानगरपालिकापाखें थीथी इलय् ५० लखतका, ७५ लख तका व १ करोड तकायाना मुक्कं २ करोड २५ लख तका ब्यूगु व नेपाल सरकारया पुरातत्व विभागं १ करोड तका ब्यूगु वय्कलं धयादिल।

२०७२ सालया भ्वखाचं क्षति जूगु थुगु देगः दयेकेत ५,६ दँ न्हय् निसें कुत जुयाच्वंगु खःसाः वडा ल्या २१ या अग्रसरता क्षति जूगु देगः जनसहभागिताय् १८ न्हूदुने पिउगु खः।