पाटन उच्च अदालतं मुद्दा खारेज यासेलिं समय् फल्चाया पुनःनिर्माण सुचारु

पाटन उच्च अदालतं मुद्दा खारेज यासेलिं समय् फल्चाया पुनःनिर्माण सुचारु


असोज ११ -  पाटन उच्च अदालतं यलया पुल्चोकय् दुगु २०० दँ पुलांगु समय् फल्चाया पुनःनिर्माण विरुद्धय् लागु मुद्दा खारेज यासेलिं समय् फल्चाया पुनःनिर्माण सुचारु जूगु दु । उच्च अदालतं समय् फल्चाया पुनःनिर्माण विरुद्धय् लागु मुद्दा म्हिगः खारेज यासेलिं समय् फल्चाया पुनःनिर्माण थौं सुथय् ६ ताःईनिसें सुचारु जूगु खः।

सुथय् ६ ताःईनिसें फल्चाया पुनःनिर्माण सुचारू जूगु  व आःतक पुनःनिमार्णय् छुं नं पंग मवगु अभियन्ता राजाराम तण्डुकारं धयादिल।

ऐतिहासिक समय् फल्चा पुनर्निर्माणया ज्या दिकेत सब्बु सिंह भण्डारीइ दायर याःगु मुद्दा उच्च अदालत पाटनया न्यायाधीश किरण प्रसाद पोखरेल व माधव प्रसाद पोखरेलया संयुक्त इजलाशं थ्वया न्हय् जारी जूगु अन्तरिम आदेश निष्क्रिय जुइगु धासें फल्चा निर्माण सुचारु यायेत म्हिगः आदेश ब्यूगु खः । थ्वया न्हय् न कुपण्डोल–जावलाखेल सडकखण्ड अन्तर्गत पुल्चोकय् लागु ऐतिहासिक समय् फल्चा निर्माण पनेत श्री लालीगुराँस बहुउद्देश्यीय सहकारीया कार्यकारी निर्देशक सुरेन्द्र भण्डारीइ तकमछि सर्वोच्च अदालत, जिल्ला अदालत ललितपुर व उच्च अदालत पाटनय् मुद्दा दायर यानादीगु खः।

तर, सर्वोच्च अदालत व उच्च अदालतया थीथी आदेश व फैसलात सुचुकाः निवेदन ब्यूगु लुसेलिं जिल्ला अदालत यलं अन्तरिम आदेश निष्क्रिय यासें फल्चा निर्माण सुचारु यायेत आदेश ब्यूगु खः । उगु हे आदेश कथं वंगु भदौ २४ गते फल्चा निर्माण शुरु जूगु छुं दिनय् मेगु मुद्दा दायर जुगुलिं पुनःनिर्माण दिउगुलिं थौं सुथंनिसें शुरु जूगु ख।

समय् फल्चाय् बुंगद्यःया रथया जात्राया इलय् समयबजी नकिगु खःसा येँयाबलय् नं हाथुद्यः ब्वःया  समय् इनिगु खः । विसं २०२९ पाखें तक समय्  फल्चा दुगु स्थानीयं धागु दु।  पुच्वया स्थानीय मनूतयसं ४७ दँ न्हय् निसें मौलिक ठासय् समय् फल्चा दयेकेत सघर्ष यानाच्वंगु खःसाः २० दँ तक कानूनी उपचारया लागि संघर्ष याःगु खः।