सक्वया मेलाया तयारी - समितिया अध्यक्षय् मिजेन्द्रकाजी श्रेष्ठ

इच्छुक फुक्कं भक्तजनतयसं थ्वपालय् धलं दनेमखनिगु

सक्वया मेलाया तयारी - समितिया अध्यक्षय्  मिजेन्द्रकाजी श्रेष्ठ

पुस २७ - सक्वय् दँय् दसं सञ्चालन जुइगु लच्छि ताःहाकगु माघ मेलाया तयारी सुरु जुगु दु। मेलाया तयारी यायेत निदँय् छक नेतृत्व परिवर्तन याइगु कथं थुगुसिइ मिजेन्द्रकाजी श्रेष्ठं नेतृत्व कयादिगु दु।

निवर्तमान अध्यक्ष गोविन्द बहादुर श्रेष्ठं निर्वाचित अध्यक्ष मिजेन्द्रकाजीयात शनिबाः पदभार हस्तान्तरण यानादिगु खः। ज्याझ्वलय् नवासें शंखरापुर नगरपालिकाया मेयर सुवर्ण श्रेष्ठं लखौँ लख मुनिगु माघ मेला सञ्चालनया लागि विशेष स्वास्थ्य सतर्कता सहित ठोस प्रस्ताव जरुरी जुगु धयादिल। वयकलं गुकथं भत्तजनतयत दर्शन याकेगु, गुकथं धलं दनिपिन्त व्यवस्थित यायेगु, स्वास्थ्य मापदण्ड गुकथं निर्माण यायेगु धकाः व्यापक सहलह जुइमागुलिइ बः बियादिल।

ज्याझ्वलय् थगुनेया आम्दानी खर्चया प्रतिवेदन नं प्रस्तुत याःगु खः। गुकिइ अनुसार आव २०७६\७७ य् आम्दानीपाखें ७२ लख ३५ द्वः ५२२ जुगु दुसाः कूल खर्च ९० लख ५९ द्वः ४५१ जुगु दु। ज्याझ्वलय् गोकर्णेश्वर नगरपालिकाया मेयर सन्तोष चालिसे, शंखरापुर नगरपालिकाया उप मेयर शुक्रलक्ष्मी श्रेष्ठ, नेपाली काँगेसया क्षेत्रिय सभापति उपेन्द्र कार्की, प्रहरी निरीक्षक जानुका पोखरेल, प्रहरी निरीक्षक गोविन्द पन्थी लगायत  थीथी निकायया ज्याकु प्रमुखतयगु उपस्थिति दुगु खः।

नवगठित समितिया निवर्तमान  दुज गोविन्द बहादुर श्रेष्ठ, वरिष्ठ  न्वकुलय् जीवनमान सिं, न्वकुत सजनी श्रेष्ठ व बालकृष्ण श्रेष्ठ, दाभरीलय् पूर्ण बहादुर श्रेष्ठ, मूछयाञ्जेलय् योगेश मान सिं, छयाञ्जेलय् बालकृष्ण सिं च्वनादिगु दुसाफ दुजलय् गंगादेवी कारञ्जित, विजयकृष्ण भाष्कर, गंगादेवी श्रेष्ठ, जमुना डंगोल, विरेन्द्रलाल श्रेष्ठ, एन्जेल श्रेष्ठ, रविन डंगोल, एलपी श्रेष्ठ, रामेश श्रेष्ठ, रम्बिकादेवी श्रेष्ठ, सरिसा श्रेष्ठ मानन्धर, पार्वती मानन्धर, कृष्णदेवी कारञ्जित, अमृत श्रेष्ठ, महेश्वर पुखुसी च्वनादिगु दु।त्वाः कजिलय् लक्ष्मीश्वरी श्रेष्ठ, अशोक श्रेष्ठ, रोमन डंगोल, सरोज श्रेष्ठ, राजाराम कुँवर, सन्तोष श्रेष्ठ, रमेश नापित दिइसा ल्यू कजिलय्  शुभद्रा श्रेष्ठ, गुञ्जन श्रेष्ठ, विरेन्द्रमान सिं, मोहनकुमार मल्ल दुथ्याः। समितिया छुं छुं दुजत व ल्यूदाभरीलिसें छुं छुं त्वाः कजि व ल्यू त्वाः कजित तयेल्यदनिइ।

थ्वहे दथुइ थुगुसिया धलंदनेत इच्छुक भक्तजनतयत न्हू समितिलिसें स्वापू तयेत समितिया नव निर्वाचित अध्यक्ष मिजेन्द्रकाजी श्रेष्ठं इनाप यानादिल।धलं दनिपिनिगु ल्याः लिसें मापदण्ड क्वःछिइगुलिइ कम ल्याखँय् जक व्रतालुतयगु उपस्थिति जुइकथं नियमित व्रत पूजा सञ्चालन यायेगु धकाः वयकलं धयादिल। धलंदनिपिगु लागि स्वास्थ्य सु्रक्षा मापदण्ड दयेकिगुलिइ इच्छुक फुक्कं भक्तजनतयसं थ्वपालय् धलं दनेमखनिगु नं वयकलं धयादिल। स्वास्थ्य सुरक्षा मापदण्डकथं ल्यःया जक  ब्रत च्वनिपिं क्वःछिइगु धकाः वयकलं धयादिल।

थुगुसिइ माघ १५ गते निसें फाल्गुण १५ गतेतक माघव नारायण, स्वस्थानी धलंलिसें मेला जुइत्यगु दु।