शंखधर व पद्मरत्नया झ्वाता पलिस्था

शंखधर व पद्मरत्नया झ्वाता पलिस्था

मंसिर ६ - नेपाल संवत्या प्रवर्तक राष्ट्रिय विभूति शंखधर साख्वाः व वरिष्ठ मानवाधिकारवादी नेता लिसें नेवाः न्ह्यलुवा पद्मरत्न तुलाधरया झ्वाता येँया शंखधर उद्यान (पुलांगु रत्नपार्क) दुने पलिस्था यागु दु। येँ महानगरपालिकापाखें निगुलिं झ्वाता तःगु खः। शंखधर उद्यान दुने शंखधर साख्वाःया दनाच्वंगु पूर्णकदया झ्वाता व पद्मरत्न तुलाधरया मेचय् फ्यतुनाच्वंगु शालीन मुद्राया झ्वाता तःगु खः ।

महानगरपालिकाया प्रमुख विद्यासुन्दर शाक्यं शनिबाः सुथय् जुगु ज्याझ्वःलय् निगुलिं झ्वाताया उलेज्या यानादिगु खः। ज्याझ्वलय् मूपाहां शहरी विकास मन्त्री कृष्णगोपाल श्रेष्ठं झ्वाताय् स्वां देछानादीगु खः ।

ज्याझ्वलय् न्ववासें मन्त्री श्रेष्ठं शंखधर साःख्वालं नीस्वंगु नेपाल संवत् नेपाःया राष्ट्रिय संवत् थुकियात सरकारी मान्यता दये हे माःगु खँय् बः बियादिल । अथे हे वय्कलं पद्मरत्न तुलाधरं थःगु जीवनय् देश व जनताया लागिं बाहेक थःगु लागिं गबलें नं छुं फ्वनामदीगु खँ कनादिल । 

महानगरपालिकाया प्रमुख शाक्यं स्थानीय सरकारपाखें हे शंखधर साख्वाः व पद्मरत्न तुलाधरया झ्वाता पलिस्था यायेगु ज्या जूगुलिं वय्कःपिनि योगदान राज्यपाखें नं सम्मानित जूवंगु बिचाः प्वंकादिल । वय्कलं धयादिल, ‘शंखधर साख्वालं नीस्वनादीगु नेपाल संवत्यात राष्ट्रिय मान्यता बीकेगु ज्याय् पद्मरत्न तुलाधरया तःधंगु योगदान दु । वय्कःपिनि योगदान सकस्यां लागिं प्रेरणाया स्रोत जुइमा धकाः येँ महानगरपालिकां थ्व झ्वाता तयेगु ज्या याःगु खः ।’

बागमती प्रदेशया भौतिक पूर्वाधार मन्त्री रामेश्वर फुयालं पद्मरत्न तुलाधरं देय्या गरिब जनताया लागिं यानादीगु आन्दोलनया खँ लुमंकादिल । 

महानगरपालिकाया उपमेयर हरिप्रभा खड्गीं लसकुस यासें न्ह्याकूगु ज्याझ्वलय् पद्मरत्न तुलाधरया म्ह्याय् सुम्निमा तुलाधरं महानगरपालिकापाखें थ्व झ्वाता पलिस्था याःगुलिं पद्मरत्न तुलाधरयात सम्मान याःगु महसुस जूगु धयादिल । 

राष्ट्रिय न्हूदँ समारोह समिति ११४१ या नायः रमेश महर्जनं नेपाल संवत्या प्रवर्तक राष्ट्रिय विभूति शंखधर साख्वाः व वरिष्ठ मानवाधिकारवादी नेता लिसें नेवाः न्ह्यलुवा पद्मरत्न तुलाधरया योगदानयात कया चर्चा यानादिल।

ज्याझ्वलय् शहरी विकास राज्यमन्त्री रामवीर मानन्धर, भाजु तुलाधरया जहान नीलशोभा तुलाधर,  महानगरपालिकाया प्रमुख प्रशाकीय अधिकृत राजेश्वर ज्ञवालीपिनिगु नं उपस्थिति दुगु खः । 

शंखधर उद्यानय् पलिस्था याःगु निगुलिं झ्वाता मूर्तिकार महेश तुलाधरं दयेकादीगु खः ।