खुयांयंकेधुंक्कुगु लुँ सम्वन्धित पसःथुवायात लःल्हात

खुयांयंकेधुंक्कुगु लुँ सम्वन्धित पसःथुवायात लःल्हात
फोटोः किरणभाइ बज्राचार्य

असोज २८ - यलया महानगरपालिका– २० श्रीबहालया  शाक्य सुनचाँदी पसया सटर तछ्याना खुया यंकुगु लुँ सम्वन्धित पसःथुवायात लल्हागु दु।

ललितपुर सुनचाँदी ब्यबसायी संघया दुज जुजु भाई शाक्यया पसलं वगु २०७६ साल माघ २० गते चान्हय् लुँवहँया तिसा तयातगु सेफ खुयायंकुगुलिइ नेपाल प्रहरीइ अनुसन्धान याना फुक्कं सामान लितब्यूगु  ललितपुर सुनचाँदी व्यवसायी संघया निर्वतमान अध्यक्ष किरणभाइ बज्राचार्यं धयादिल  ।

वयकलं ललितपुर प्रहरी परिसरया प्रमुख प्रहरी उपरिक्षक टेकबहादुर राई, तत्कालिन पुल्चोक प्रहरीया प्रमुख निरीक्षक पूर्णिमा चन्द,  ललितपुर उद्योग वाणिज्य संघया पूर्व अध्यक्ष अजरमान जोशी,  ललितपुर सुनचाँदी व्यवसायी संघया अध्यक्ष रमेशबहादुर शाक्य, ललितपुर सुनचाँदी व्यवसायी संघया ज्यासना पुचया सकले दुजपिं, अनुसन्धाय् खटेजुपिं प्रहरी लगायत फुक्कंसिगु ग्वाहालिइ खुया यंकेधुक्कुगु सामान लितकायेफुगु धासें वयकपिन्त सुभाय् देछानादिल।

वंगु माघ २० गते  चान्हय् शाक्य ज्यासः पसया लुखाया ताफ्वः तछ्याना  लुँवहँया तिसाः,धिबाः तयातःगु सेफ खुया यंकुगु खसाः सीसीटीभी फुटेज व मोबाइल लोकेशनया आधारमा अनुसन्धान याना घटनाय् संलग्न प्यम्हसित महानगरीय प्रहरी अपराध शाखा यल व महानगरीय प्रहरी प्रभाग पुल्चोकया संयुक्त टोलीइ फागनु १ गते बिहीबाः ज्वगु खः। ९३.३० तोला लुँ व २६५ तोला वहँया तिसा खुयायंकुगु धागु दु। थ्व घटनाय् भारत छेँय् जुया येँया कालिमाटीइ च्वनाच्वम्ह २१ दँया चन्दन कुमार पोदार (जैसवाल), १९ दँया रबिनकुमार साह (पोदार) व सतुङगल च्वनाच्वम्ह ४० दँया कृष्णादेवी पोदार व सुरज कुमार पोदारयात सतुंगल व  थानकोटं ज्वंगु महानगरीय प्रहरी परिसर यलं धागु दु।

इमित ज्वना थप अनुसन्धान याना अदालतया प्रक्रिया पूंवकाः प्रहरीं खुया यंकेधुक्कुगु सामान सम्वन्धित थुवायात लल्हागु खः।