स्वयम्भू बुद्ध पार्कय् अत्याधुनिक चःबि निर्माण

स्वयम्भू बुद्ध पार्कय् अत्याधुनिक चःबि निर्माण

मंसिर ५ -  येँय् महानगरपालिकां फुक्कं वडाय् सुबिधाजनक सार्वजनिक चःबि निर्माण यायेगु योजना न्ह्याकुगु दु।

विश्व चःबि दिवस २०२० या झ्वलय् थ्वहे योजनाकथं चक्रपथ सडक खण्डया स्वयम्भू बुद्ध पार्क क्षेत्रय् दयेकुगु स्वचालित नमूना सार्वजनिक चःबिया महानगरपालिकाका प्रमुख विद्यासुन्दर शाक्यं शुक्रबाः शुभारम्भ यानादिगु दु। ४०० बर्ग फिट क्षेत्रफलय् दयेकुगु चःबिया शुभारम्भ यासें प्रमुख शाक्यं सार्वजनिक चःबियात परम्परागत स्वरुपपाखें आधुनिक लिसें अत्याधुनिक ढाँचाय् रुपान्तरण यायेगु व व्यवसायिकतापाखें सेवामुलक याना यंकेगु महानगरया योजना दुगु धयादिल।

वयकलं येँय् महानगरं सम्पदा व भीड जुइगु ठाययात प्राथमिकताय् तया सार्वजनिक चःबि निर्माण यायेगु नीति कथं ज्या यानाच्वगु धयादिल । ज्याझ्वलय् उपप्रमुख हरिप्रभा खड्गी श्रेष्ठं महिनावारी प्याड मेसिनय् धिबाः कुर्का स्यानिटरी प्याड मेसिन सञ्चालन सुरु यानादिल। ज्याझ्वलय् उपप्रमुख हरिप्रभा खड्गी श्रेष्ठ, महानगरया प्रवक्तालिसें वडा १५ या अध्यक्ष ईश्वरमान डंगोल, सहरी योजना आयोगया दुज मनराजा रञ्जित, एरोसानया राष्ट्रिय प्रतिनिधि प्रकाश अमात्य लगायतं अत्याधुनिक चःबि निर्माणयाबारे नवानादिगु खः।

स्वयम्भूइ ५५ लख तकाया लागतय् निर्माण जुगु चःबिया लागि वडा १५ पाखें ५ लखतका व ल्यदनिगु एरोसानयापाखें तःगु खः।चःबिया भवनय् वाःति लः मुंकेत १२ द्वः लिटरया लः संकलन ट्याङ्की तगु दुसाः चःबि मिसा, मस्त, अपाङ्गता जुपिं मनूत, जेष्ठ नागरिक फुक्कसिगु लागि प्रयोग मैत्री दु। थुगु ठाय जुया दैनिक २ द्वःलं मल्याक आन्तरिक पर्यटक स्वयम्भु वयेवने यानाच्वंगु दु।