जुजु वीरेन्द्रया निजी निवास 'श्री सदन' सर्वसाधारणया लागि खुला

जुजु वीरेन्द्रया निजी निवास 'श्री सदन' सर्वसाधारणया लागि खुला

मंसिर ६ - नारायणहिटी दरबार सङ्ग्रहालयदुनेया तत्कालीन जुजु वीरेन्द्र शाहया निजी निवास ‘श्री सदन’ सर्वसाधारणया लागि खुला जुगु दु ।

संस्कृति, पर्यटन तथा नागरिक उड्डयनमन्त्री योगेश भट्टराईं नं शनिबाः औपचारिक कथं सुरुवात यासेलिइ आइतबाःनिसें ‘श्री सदन’ सर्वसाधारणया लागि खुला जुगु खः। 

देश व विदेशया अनुसन्धानकर्तातयगु लागि श्री सदन खुला जुगु महत्त्वपूर्ण पक्ष जुगु धासें मन्त्री भट्टराईं नं जुजु वीरेन्द्रया जीवनशैली, पारिवारिक अवस्था लगायतया विषय सिइकेत ग्वाहालि जुइगु विश्वास प्वकादिल। नेपाली इतिहासय् २४० दँया  शाह वंश इतिहासया साक्षात् नमुनाया रुपय् श्री सदनयात संरक्षण यायेगु मन्त्री भट्टराई नं धयादिल।

नारायणहिटी दरबार सङ्ग्रहालय विकास समितिया कार्यकारी निर्देशक भेषनारायण दाहालं थुगुसिया सुरुइ हे  श्री सदन खुला यायेगु योजना दुगु जुसाः नं कोभिड–१९ या कारण सम्भव मजुगु धयादिल। आःतक ५२ कक्षमध्ये ३२ जक खुला जुगु वयकलं धयादिल। ५२ कक्षया फुक्कं लुखाया नां हिमालपाखें व फुक्कं कोठाया नां जिल्लापाखें तगु नं वयकलं धयादिल। अझं मनाङ, मुस्ताङ, जाजरकोट थज्याःगु १२ गू जिल्ला खुला याये ल्यदनिगु व छसिकथं खुला यानावनेगु धकाः वयकलं धयादिल।

श्री सदन खुल्ला यासेलिइ मोटर ग्यारेजय् हिटलरं वीरेन्द्रयात उपहारकथं ब्यूगु गाडी नं प्रदर्शनय् तःगु दु। अथेहे तत्कालीन जुजु त्रिभुवन, महेन्द्र व वीरेन्द्रं गइगु गाडी व वीरेन्द्रं प्रयोग याःगु हेलिकप्टर व हवाइजहाज नं अवलोकनया लागि तयातःगु दु।

२०२३ सालय् दयेकुगु थ्व सदनय् स्वतजा दु। १२ कोठा दुगु थुगु भवनया छेलिइ वीरेन्द्रया निजी ज्याकु दु। तःधि जुसेलिइ दीपेन्द्र श्री सदनं त्रिभुवन सदनय् झागु खःसाः मेपिं परिवारया दुजत श्री सदनय् च्वनावयाच्वगु खः। गणतन्त्र स्थापनालिपा दरबार सङ्ग्रहालयय् परिणत जुसाः नं थ्व सदन धासाः बन्द यानातःगु खः।