चिबाखं - भाईरल

- ज्ञानी राजा मानन्धर

चिबाखं  -  भाईरल
Gyani Raja Manandhar

लकडाउनया इ:!

छगू सामाजिक सँस्थां राहत बियाच्वन धैगु सुचं न्हाय्पनय् लायेवं रामहरी लयेताल ! निम्ह म्ह्याय्पीं व तिरी मय्जुयात नं राहत कायेत ब्वना यनेगु क्व:छित !

त:धिम्ह म्ह्याय् व तिरी निम्हं वनेत तयार जुल ! तर चीधिम्ह म्ह्याय् लिचिल ! रामहरिं गुलि कुत: यात वयात नं नापं यनेगु ! तर खँ न्यंके फूगु हे मखु !

रामहरी तम्वया: " छाय् मछाला:गु छ ? गपतय् लुँया सिख: व ल्हा:ती आइ फोन ज्वना व:पीं तक ला राहत फया: वनाच्वंगु दु धा:गु न्यना जिँ ! छ गुलि त:धं जुया च्वने मा:गु ? खुरुक्क नु !"

म्ह्याय्म्हं तत:सलं हाल ! धाल " जि वनेमखु धासेंली वने हे मखु का ! द्यां लाना च्वने , तर वनेमखु ! झी गरीब जुलं छु जुल  झीगु नं ला इज्जत दु नि ! उकुन्हु जिम्ह पासा छम्ह नं वनागु हं ! निगु पाकेट चाउचाउ बिया: न्हय्म्हस्यां पालंपा: व नाप प्यपुना : किपा काल हं ! वो हे किपात थौं कन्हे फेसबूकय् भाईरल जुयाच्वंगु दु !"