मोबाइलया लागि रजुनमान श्रेष्ठया हत्या

हत्याय् संलग्न ४ म्ह आरोपीयात ज्वन

मोबाइलया लागि  रजुनमान श्रेष्ठया हत्या


फागुन ७ - येँया गुहेश्वरी देगलिक्क वाग्मतीइ शनिवाः छगू सिम्ह लुगु दु । फागुन १ य् लुगु सिम्ह येँय् ७ छेँय् जुम्ह  ४९ दँया रजुनमान श्रेष्ठया जुगु प्रहरीइ धागु दु। छेँय् नं गाडी चले यायेगु सयेकेत वाग्मती करिडोर थ्यम्ह श्रेष्ठयात स्याना त्वताःतगु प्रहरीया अनुसन्धानं सिइदुगु दु। हत्याय् संलग्न ४ म्ह सित ज्वंगु महानगरीय प्रहरी परिसर येँया प्रहरी बरिष्ठ उपरिक्षक (एसएसपी) अशोक सिंहं धयादिल ।

रामेछापया लिखु तामाकोशी गाउपालिका३ छेँय् जुम्ह १८  दँया विशाल तामाङ,सन्तोष तामाङ,सन्त कुमार तामाङ व २० दँया लाक्पा तामाङयात ज्वंगु खः। हत्या आरोपीत बौद्धया न्हूगु बस्तीइ वालं च्वनाच्वंगु खः ।

इपिंमध्ये ३ म्हसित न्हूगु  बसपार्क व विशाल तामाङयात नयाँबस्तीइ नियन्त्रणय् काःगु एसएसपी सिंहं धयादिल।

मोबाइलया लागि हत्याः प्रहरी

रजुनमान श्रेष्ठ न्हिंन्हिं सुथय् गाडी सयेकेगु लागि गुहेश्वरी करिडोरइ वनिगु जुयाच्वन। न्हिं न्हिं सुथय्  ३ तानिसें ३ ३० या दथुइ गाडी ज्वना पिहाँवनिम्ह वयक फागुन १ य् धासाः चान्हयसिया १२ तापाखें हे मैजुबहालय् च्वंगु छेँय् नं गाडी ज्वना पिहाँवन।

गुहेश्वरी देगया मेखेपाखें थ्यसेलिइ गाडी स्यन। अनुसन्धानय् संलग्न प्रहरी अधिकृतया कथं वयकलं मिस्त्रीयात फोन याना छक वया गाडी स्वयाबिइत इनाप यानादिल । तर, वाचाइलय् मिस्त्रीइ वयेमखु धासेलिइ नारायणमार्गय् गाडी त्वःता वयक दिव्यश्वरी पार्टी प्यालेसपाखें वन। 

दिव्यश्वरीइ लिहाँवबलय् उगु करिडोरय् १२ ४० मिनेटय् पाखें ४ म्ह मिजंतलिसें नाप लागु जुयाच्वन। लाक्पा तामाङनापंया ४ म्ह चावहिलया बेबिलोन डिस्कों पिहाँवया नयाँबस्तीइ न्यासी जुयाच्वगु जुयाच्वन।

४ म्ह जानां रजुनमानयात आक्रमण याना, दाया गम्भीर घाःपा जुसेलिइ रजुनमानयात त्वःता इपिं बिस्यू वन। रजुनमानया मोवाईल रामेछापया लिखु तामाकोशी गाउपालिका–३ छेँय् जुम्ह १८ दँया विशाल तामाङ्गं कया वंगु जुयाच्वन।

आरोपीत ४ म्ह लिखु तामाकोशी गाउँपालिका–३ या जुगु व मोवाईल लाका कायेगु नियतं आक्रमण यागु खनेदुगु एसएसपी अशोक सिंहं धयादिल। दाःया न्यासी जुइमफुसेलिइ वाग्मतीइ तुना रजुनमान सिगु अनुसन्धानं सिइदुगु वयकलं धयादिल।

अनुसन्धान यांयां वंबलय् प्रहरीइ दकलें न्हापां विशालयात ज्वंन। विशालं बयानया झ्वलय् मेपिन्सं नं दागु धाल । अनलंलिपा विशाल बाहेक मेपिं ३ म्हसित न्हूगु बसपार्कया गेष्ट हाउसय् सुलाच्वंगु अवस्थाय् महानगरीय प्रहरी परिसर येँया टोलीइ ज्वंगु खः।

त्रिवि शिक्षण अस्पतालय् रजुनमानया सिम्ह पोष्टमार्टम याःगु दु । पोष्टमार्टमय् ‘लखय् तुना सिगु’ धकाः रिपोर्ट वगु दु।

सिम्हसिगु मोवाइल प्रहरीइ विशाल तामाङया डेरां बरामद यागु दु । हत्याय् संलग्न आरोपी मध्येया विशाल गाडी चालक खः ।