जग्गाधनी बेल्जियमय् , दलालं नक्कली नागरिकता व लालपुर्जा दयेकाः थानकोटया २० आना जग्गा मियाबिल

जग्गाधनी बेल्जियमय् , दलालं नक्कली नागरिकता व लालपुर्जा दयेकाः थानकोटया २० आना जग्गा मियाबिल


फागुन २३ नक्कली भ्वँ दयेकाः म्याग्दीया मीना खड्काया नामय् दुगु येँया जग्गा मिउपिं ९ म्हसित ज्वंगु दु। 

बेल्जियमय् च्वनाच्वम्ह म्याग्दीया मीना खड्काया नक्कली नागरिकता व लालपुर्जा दयेकाः वयकया नामय् दुगु थानकोटया २० आना जग्गा मिउगु द्पनय् प्रहरीइ ९ म्हसित ज्वंगु खः। थ्व मुद्दाय् छुं छुं मनूतयत न्हापां हे ज्वनेधुक्कुगु व थप ९ म्हसित आः ज्वंगु महानगरीय प्रहरी परिसर येँय् नं धागु दु । 

प्रहरीइ आः येँया विजयकुमार खड्का, धादिङया नीलकण्ठया बालप्रसाद भट्ट, काभ्रेया रामचन्द्र पुडासैनी, सङ्खुवासभाया इन्द्रबहादुर घले, रामेछापया बालकृष्ण बुढाथोकी, सिन्धुपाल्चोकया लक्ष्मी घतानी, ओखलढुङ्गाया विजयप्रकाश सुनुवार, सिन्धुलीया कृष्णबहादुर दर्लामी व झापाया कृष्णबहादुर कटुवालयात ज्वंगु खः।

दलालतयसं मीनाया जग्गा ७२ लख तकाय् कृष्णगोपाल श्रेष्ठ व कृष्णभक्त माक श्रेष्ठयात पास यानाब्यूगु खः। दलालतयसं थ्वहे जग्गा काभ्रेय कुमार दाहालया नामय् पास यानाबिइगु धासें ३५ लख तका बैना रकम कायेधुक्कुगु प्रहरीइ धागु दु। 

थ्वहे घटनाय् थ्वया न्हय् मालपोत ज्याकु कलङ्कीया कर्मचारीत  दीपक दाहाल, नारायण श्रेष्ठ व दीपा पंज्ञानी अदालतं धरौटीइ रिहा जुइधुक्कुगु दु। थ्व घटनाय् संलग्न छुं छुं बिस्यूवनाच्वंगु व इमिगु मालेज्या जुयाच्वंगु प्रहरीइ धागु दु ।