थाैं काैलाथ्व एकादशी, असंचालं

थाैं काैलाथ्व एकादशी, असंचालं


असोज ३० - थौं कौलाथ्व एकादशी, येँय् असनय् च्वंपिनि थौं चालं यानाच्वंगु दु। असनय् च्वंपिं सकसिगु हे चालं जूगुलिं थौंया दिंयात असंचालं नं धायगु या:। थौं असं त्वा:या तुलाधरतय्सं विशेषरूपं चालं हनी।

असंया तुलाधरतय्सं थौं मचापाया: पिथनेगु चलन दु। असंभलु अजिमा देग:या लिक्कच्वंगु आगंछेँथासं तुलाधरतय्सं पाया: पिथना: असं लागा चा:हिला: हाकनं आगंछेँय् हे वया: पाया: क्वचाइ। असं तुलाधर खल:या जंकु यायधुंकूम्ह मध्ये दकलय् क्वकालिम्ह कायमचाया ल्हातं भुयूफसि पाला: पाया: क्वचायकी। पाया: पिथनेत दकलय् क्वकालिम्ह कायमचाया छेँय् गुंला बाजं सहित सकलें वना: का:वनेमा:गु चलन दुगु असंया रोशन तुलाधरं धयादिल।

उखे, मोहनिया मूनख: क्वचायका: थनिंनिसें नेवा:त नख:त्या वनेगु यानाच्वंगु दु। थ:थिति लिसें थकालिपिनिगु ल्हातं मोहनि सिन्ह: तीगु लागिं थनिंनिसें कतिपुन्हितकया दुने थ:थितिपिन्थाय् नख:त्या वना: थकालिपिनिगु ल्हातं सिन्ह: तीगु चलन दु। थ:थितिपिन्थाय् वना: सिन्ह: त्यूवनीपिनिगु कारणं लँय् चहल पहल नं अप्वयाच्वंगु दु।