बुंगया आजु अजिया जात्रालिसें हनुमान जात्रा मच्छिन्द्रबहालय् जक सिमित याइगु

मेमेगु जात्रा धासा क्षमापुजाय् जक सिमित याइगु

बुंगया  आजु अजिया जात्रालिसें हनुमान जात्रा मच्छिन्द्रबहालय् जक सिमित याइगु
फाइल किपाः


कार्तिक २ - यलया बुंगय् मोहनीया झ्वलय् हनिगु फुक्कं जात्रायात थुगुसिइ औपचारिकताय् जक सिमित याइगु जुगु दुसा मयासें मगाःगु जात्रात धासाः मच्छिन्द्रबहालय् जक सिमित याइगु जुगु दु।

यल महानगरपालिका वडा ल्याः २२ या  पहलय् मोहनी नखः, आजु आजी लिसें हनुमान जात्रा, या विषयलय् थीथी सरोकारवाला संस्थालिसें जुगु सहलहं नं कोरोना भाइरसया जोखिम अप्वयाच्वगुलिइ थुगुसिइ मोहनी बलय् हनिगु जात्रायात क्षमापूजाय्  सीमित यायेत निर्णय याःगु खः।

बैठकं गोरखा दरबारं हनुमाध्वाखा जुयाः बुंगय् सप्तमी हइगु फूलपाती नं महइगु सम्भावना दुगुलिइ फूलपाती खुन्हू सोह्रखुट्टेतक नागचा प्याखं, बाजं व बलीनापं फूलपाती कावनेगु परम्परायात नं क्षमापूजाय् सीमित तयेगु निर्णय याःगु खः। अथेहे  नवमी खुन्हु मच्छिन्द्रबहालय् याइगु कोतपर्वयात नं क्षमापूजाय् सीमित याइगु जुगु दुसाः नवमीया चान्हय् याइगु मुकु पुनापिहाँवइगु जात्रा लगायत आन्तरिक रूपय् याइगु फुक्कं नियमित पूजा यायेगु व आजु अजिया जात्रा मच्छिन्द्रबहालय् जक सीमित यायेगु, दशमी खुन्हू भारी पूजा, आजु अजिया जात्रा व हनुमान जात्रा यायेगु, मनकामनाअजियात सुवां नं ज्वनातइगु बिन्दु पात्र दुगु झौः द्य चाहिकाः आजु अजियात थगु हे ठासय् विज्याकिगु निर्णय जुगु दु। अथेहे एकादशी खुन्हू पानेजुतयगु फुक्कं आन्तरिक पूजालिपा आजु अजियात खटय् विज्याका फुक्कं भक्तजनतयत पूजा यायेगु व्यवस्था यायेगु व उखुन्हू हे भक्तजनतयसं मच्छिन्द्रबहालय् स्वकः चाहिका आजु अजियात देगलय् विज्याकिगु निर्णय जुगु यल महानगरपालिका वडा ल्याः २२ या वडाध्यक्ष अम्बिर राज शाक्यं धयादिल।

जात्राबारे निर्णय यागु बैठकय् पानेजु संघ, ग्वाला पाला, गुरुजु, बाजं खलःत, राजनीतिक दलया प्रतिनिधि, प्रहरी प्रशासनलिसें मेमेगु सरोकारवाला निकायतयगु ब्वति दुगु खः।