चाँगुनारायणय् फायागु फार्म चिकेत नगरपालिकाया निर्देशन

चाँगुनारायणय् फायागु फार्म चिकेत नगरपालिकाया निर्देशन


कार्तिक ५ - ख्वपया चाँगुनारायण नगरपालिकां नगरदुने सञ्चालन जुयावयाच्वगु फा (बंगुर) फार्म चिकेत निर्देशन ब्यूगु दु।

फायागु फार्मं नगरदुने फोहोरप्रदूषण अप्वयेकूगु व स्थानीयया स्वास्थ्य अवस्थाय् प्रतिकूल असर लाकूगु धासें पालिकां अथे निर्देशन ब्यूगु खः।

चाँगुनारायण नगरपालिकां नगरसभापाखें निर्णय यानाः नगरदुने दर्ता यानाः व दर्ता मयासें सञ्चालन जुयाच्वंगु फुक्कं फायागु फार्म चिकेत धागु दु।

स्थानीय बासिन्दां फायागु फार्मपाखें फोहोररप्रदूषण अप्वगु व उगु फार्म बन्द यायेत माग वगुलिं पालिकां थथे निर्णय याःगु नगरपालिकाया प्रशासन शाखाया अधिकृत निलाकुमारी घिमिरें धयादिल । वय्कलं सूचं पिहाँवगु ३० न्हू दुने फार्म चिकेमाःगु व उकिया जानकारी नगरपालिकाय् बिइमाःगु धयादिल।

३० न्हूदुने फार्म मचिकूसाः पालिकां कारबाही याइगु ख्याचो नं ब्यूगु दु।