थनिनिसें मोहनी  शुरू

थनिनिसें मोहनी  शुरू


असोज २१  - थाैं काैलाथ्व पारू, थनिनिसें मोहनी नखः  शुरू जुगु दु ।

थौं छेँखापतिक नलास्वाँ पियाच्वगु दु । कौलाथ्व पारू खुन्हुनिसे आगमय् विधिपूर्वक कलश तयाः गणेद्यःया पुजा यानाः चाया पूर्ण कलशय् गोबर तयाः नलास्वाँ पिइगु चलन दु। थौं पिइगु नलास्वाँ चालं खुन्हु क्वकयाः सिन्हः तिकिइबलय् बिइगु याइ । नलास्वाँयात समृद्धिया प्रतिक कथं कायेगु याः।

थनिंनिसें हे नेवा:तय् फुक्कं धइथें बस्तीइ नवरथ वनेगु नं परम्परा दु। नवरथ वनेगु धका: नेवा:तयसं थीथी तीर्थ चा:हिला: नवनागयात पुज्याइगु खः। थौं पारुखुनु शंखम्व:या शंकरतीर्थय् वना: शंखपाल नागराजया पुजा यायगु चलन दु। गुन्हुतक थीथी तीर्थ चा:हिला: दशमीखुनु गुह्येश्वरीया शान्ततीर्थय् सोमशिखि नागराजया पुजा याना: नवरथ वनेगु क्वचायकी।

थौं हे येँया हुनमानध्वाखा लायकुलिइ च्वगु दशै घरय् वैदिक विधिकथं नलास्वाँ पिनाः महाकाली, महालक्ष्मी, महासरस्वती लगायत नवदुर्गा व ममेगु शक्तिपीठय् नवरात्री पुजा न शुरू जुइ।

नवरात्री ज्वःछि हिन्दु धर्मावलम्बीतयसं सुथय् सुथय् छेँय् व भगवती द्येःगलय् वना सप्तसप्ती, चण्डी व भगवती स्तोत्र पाठ न याइगु चलन दु। दुर्गा भवानी शुम्भ निशुम्भ, महिषासुर लगायतया दानवतयत स्यानाः दानबी शक्तियात त्याकुगु लसताय् नवरात्र ज्वःछि नवदुर्गा भवानीया पुजा याइगु चलन दु । थौं शैलपुत्री भवानीया पुजा जुइ।