१० द्वः डलरया अन्तर्राष्ट्रिय अवार्ड दिलकुमार बाराहीयात लःल्हात

१० द्वः डलरया अन्तर्राष्ट्रिय अवार्ड दिलकुमार बाराहीयात लःल्हात


असोज २२-   यलया बुंगद्यःया रथ दयेकेगु ज्याया सिंज्याकःमी नायः दिल कुमार बाराहीयात  दक्षिण कोरियाया झान्जु शहरं ‘झान्जु अन्तर्राष्ट्रिय सिरपाः’ लःल्हागु दु । झान्जु शहरं  हलिंन्यकंया अमूर्त सांस्कृतिक सम्पदा प्रवर्द्धन यायेत दँय् दसं बिइगु ‘झान्जु अन्तर्राष्ट्रिय अवार्ड’ म्हिगः बहनी भर्युअल माध्यमं जूगु ज्याझ्वलय् बाराहीयात लःल्हागु खः।

बाराहीयात बुंगद्यःया रथ दयेकेज्या ५० दँ मल्याकं संलग्न जुया सांस्कृतिक सम्पदा प्रवर्द्धन यायेत म्हितुगु भूमिकायात उच्च मूल्याकंन १० द्वः अमेरिकी डलरनापंया थुगु सिरपा लःल्हागु मोनालिसा महर्जनं धयादिल।

पोर्चुगलया डी इभोरा विश्वविद्यालयपाखें सम्पदा संरक्षणय् पिएचडी यानादीम्ह मोनालिसा महर्जनं दिलकुमार बाराहीया लागि अन्तर्राष्ट्रिय प्रतिस्पर्धाय् सामेल यायेत फुक्कं प्रक्रिया यानादिगु खः।

थुगुसिइ थुगु अवार्ड नेपालपाखें बाराही नापं इटलीया एल फेल्ज व ताजिकिस्तानया डा. सिरिन्बेक दाभ्लाटमामाडोभयात नं ब्यूगु खः ।