युरोप हाकनं कोरोनाया इपीसेन्टर जुल, संक्रमण ५५ प्रतिशतं थहाँवन

युरोप हाकनं कोरोनाया इपीसेन्टर जुल, संक्रमण ५५ प्रतिशतं थहाँवन


कार्तिक २३ - युरोपय् लिपांगु लच्छिया दुने कोरोना संक्रमण ५५ प्रतिशतं थहाँवंगु विश्व स्वास्थ्य संगठनं धागु दु।युरोप हाकनं कोरोनाया इपिसेन्टर जूगु धासें संगठनं चिन्ता व्यक्त याःगु दु। युरोपबाहेक अमेरिका, चीन लगायतया देशय् नं संक्रमण अप्वयाच्वंगु दु। 

युरोप व मध्य एसियाया यानाः ५३ देय्या संक्रमणदर चिन्ताया विषय जूगु संगठनं धागु दु। संगठनया कथं युरोपय् लिपांगु ४ वाःलय् संक्रमण ५५ प्रतिशतं थहाँवंगु खः। लिपांगु वालय् जक युरोपन्यकं १८ लखं मल्याकं न्हूपिं संक्रमित थप जूगु दु। थ्व छवाः दुने युरोपय् कोभिड–१९ पाखें सिइगु केस २४ द्वःलं मल्याकं थ्यंगु दु। छवाःदुने हलिन्यकं थप जूपिं संक्रमित मध्ये ५९ प्रतिशत युरोपय् दुगु संगठनं धागु दु। 

युरोपया इटाली, जर्मनी, फ्रान्स, पोर्चुगल, ग्रीस लगायतया देशय् तिब्र गतिइ संक्रमण फैले जूगु दु। थुपिं देशय् यक्वसियां कोभिड–१९ विरुद्धया खोप कायेधुक्कुंगु दु। तर नं संक्रमण अस्वभाविक रुपय् फैले जुसेलिं विश्व स्वास्थ्य संगठनं चिन्ता व्यक्त याःगु खः। 

दच्छि लिपा युरोप हाकनं कोभिड–१९ या इपिसेन्टरया रुपय् खनेदुगुलिं थ्व तसकं चिन्ताया विषय जूगु विश्व स्वास्थ्य संगठनया डाक्टर हान क्लुजं धयादिल।