कोरोनाविरुद्धया खोप न्यायपूर्ण व समान तरिकां फुक्कं देशं कायेदयेमाः: परराष्ट्रमन्त्री खड्का

कोरोनाविरुद्धया खोप न्यायपूर्ण व समान तरिकां फुक्कं देशं कायेदयेमाः: परराष्ट्रमन्त्री खड्का


असोज १२ - परराष्ट्रमन्त्री डा. नारायण खड्कां कोरोनाविरुद्धया खोपया असमान वितरणं न्यून आय दुगु देयया आर्थिक-सामाजिक असर लागु धासे फुक्कसियां न्यायपूर्ण व समान तरिकां खोप कायेदयेमाः धयादिल । संयुक्त राष्ट्र संघया ७६ क्वःगु महासभायात थाैं सुथय् अमेरिकाया न्यूयोर्कय् सम्बोधन यासें परराष्ट्रमन्त्री खड्कां थथे धयादिगु खः।

नेपाली जनतायात कोरोना संक्रमणपाखें सुरक्षित यायेत वर्तमान सरकारं खोपया व्यवस्थापन व खोप बिइगु ज्यायात उच्च प्राथमिकताय् तःगु जानकारी बिसें मन्त्री खड्कां फुक्कं नेपालीयात खुलाया दुने खोप बिइगु लक्ष्य दुगु धयादिल।

अथेहे वय्कलं अफगानिस्तानय् तालिबानया आगमन आन्तरिक विषय जूगु धयादिगु दु । मन्त्री खड्कां अफगानिस्तान, लिविया लगायत द्वन्द्वग्रस्त मुलुकया स्थायित्व थःगु हे अन्तरिक विषय जूगु धयादिल। वयकलं थुपिं देयया समस्या समाधान आपसी समझदारीइ जुइगु विश्वास नेपाःया दुगु धयादिल। अथे खसाः नं वयकलं आणविक हातहतियारया होडबाजी व आतंकवाद मानव अस्तित्वया शत्रु जूगु न्हयथसें नेपालं उकिया विरोध यानाच्वगु धयादिल ।

परराष्ट्रमन्त्री खड्का नेपाली प्रतिनिधिमण्डलया नेतृत्व यासें राष्ट्रसंघया महासभाय् ब्वति कायेगु झ्वलय् वयक थुथाय् अमेरिकाया न्यूयोर्कय् दी।