थौं कछलाथ्व एकादशी, हरिवोधिनी एकादशी

थौं कछलाथ्व एकादशी, हरिवोधिनी एकादशी


 कार्तिक २९ - थौं कछलाथ्व एकादशी, हरिवोधिनी एकादशी, नारान्द्य:या पुजा याना: हनाच्वंगु दु।

पुराणय् न्ह्यथनात:कथं दिल्लाथ्व एकादशीखुनु शेषनागया म्हय् द्यनाबिज्या:म्ह नारान्द्य: थौं कछलाथ्व एकादशीखुनु न्ह्यलंचा:गु ख:। पौराणिकबाखंकथं मूर नांया दैत्यया आतंकं द्य:पिन्त मुक्त यायत नारान्द्यवं यक्व संघर्ष यायमा:गु ख:। युद्धं त्यानुया: आराम यायत बद्रीआश्रमया हेमवती गुफाय् वना: द्यनाबिज्या:म्ह नारान्द्य: न्ह्यलंचा:गु लुमन्तिइ थौंया दिंयात हरिबोधिनी एकादशी धयात:गु ख:। मेगु पौराणिक मान्यताकथं हरिशयनी एकादशींनिसें थौं हरिवोधीनी एकादशीतक प्यलातक नारान्द्य: शेषनागया म्हय् द्यनाबिज्याइगुलिं थ्व ज्व:छिं या:गु चतर्मास व्रतया अनुष्ठान थौंया हे दिनंनिसें क्वचायकी। नारान्द्य: द्यनाबिज्या:गु दिंयात हरिशयनी एकादशी धायगु या:। निगुलिं एकादशीयात त:धंगु एकादशीकथं कायगु या:।

थौं स्वनिग:या प्यम्ह नारान्द्य: इचंगु, विशंखु, चांगु व शेषनारायणय् विशेष मेला जुयाच्वंगु दु। अथहे, येँय्या भुइजःसि नारायणद्यःथाय् नं विशेष मेला न्ह्याःगु दु।  थगुने थ्व मेला कोरोना भाइरसया संक्रमणया कारणं मयाःगु खः।

थ्वहे दथुइ, बूढानीलकण्ठ व नागार्जुन नगरपालिकां थौं हरिबोधिनी एकादशीया झ्वलय्  सार्वजनिक बिदा ब्यूगु दु । नाजांगु भइजःसि देगः बूढानीलकण्ठ नगरपालिकाय् लागु व दँय् दसं थौंया दिनय् विशेष मेला जुइगुलिं नगरपालिकां बिदा ब्यूगु खः । अथेहे नागार्जुन नगरपालिका नं नेपाःया प्यम्ह  नारायण मध्येया कान्छाम्ह नारायण, इचङ्गुनारायणय् विशेष मेला जुइगुलिं थौं बिदा ब्यूगु खः।  

अथेहे थनिनिसें च्वबहाःया लच्छि ताहाकःगु मेलाया झ्वलय् माय् अपसं नं शुरू जूगु दु।