उपत्यका विकास प्राधिकरण खारेज यायेत स्वनिगया मेयरतयगु माग

उपत्यका विकास प्राधिकरण खारेज यायेत स्वनिगया मेयरतयगु माग


जेठ २६ - स्वनिगया नगरपालिकाया मेयरतयसं उपत्यका विकास प्राधिकरण तत्काल खारेज यायेत माग तगु दु।

इमिसं वि.सं. २०४५ सालय् तत्कालीन जुजु वीरेन्द्रया लालमोहर लगायतया ऐनया आधारय् न्ह्यानाच्वंगु उपत्यका विकास प्राधिकरणयात आःयागु संविधानं म्हमस्यूगु धासें  प्राधिकरण खारेजीया माग यानावयाच्वंगु दु। 

काठमाण्डौं उपत्यका विकास प्राधिकरणय् वि.सं. २०६८ य् न्हापांगु संशोधन जुगु खः। उपत्यका नगरपालिका फोरमं उपत्यका विकास प्राधिकरण अविलम्ब खारेजी यायेत सङ्घीय सरकारलिसें इनाप याःगु खः। फोरमं विज्ञप्ति जारी याना शहरी विकास मन्त्री वसन्तकुमार नेम्वाङ व राज्यमन्त्री रामवीर मानन्धरलिसें थथे इनाप याःगु खः। विज्ञप्ति जारी याये न्हय् फोरमया नाय नं जुयादिम्ह येँय् महानगरपालिकाया प्रमुख विद्यासुन्दर शाक्य, न्वकुलिसें यल महानगरपालिकाया प्रमुख चिरिबाबु महर्जन व छयाञ्जेलिसें मध्यपुर थिमी नगरपालिकाया प्रमुख मदनसुन्दर श्रेष्ठं शहरी विकास राज्यमन्त्री मानन्धरलिसें सहलह यानादिगु खः। वि.सं. २०७६ साल वैशाख २५ गते फोरमया नाय न जुयादिम्ह शाक्यया अध्यक्षताय् जुगु प्यक्वःगु विस्तारित बैठकं नं प्राधिकरण खारेजीया माग याःगु खः। 

‘प्राधिकरण वि.सं. २०४५ सालय् गठन जुगु संस्था खः। थ्व संस्था तत्कालीन जुजु विरेन्द्रं जारी याःगु पञ्चायती अवशेषया ऐनय् च्वनाच्वंगु दु। थुकिया जग बल्लाःमजु,’ फोरमया छयाञ्जे न जुयादिम्ह मदनसुन्दर श्रेष्ठं धयादिल, ‘प्राधिकरण देशय् गाउँपञ्चायत दुबलय् स्थापना जुगु संस्था खः।आः गाविस जुया स्थानीय सरकार दयेधुक्कुगु अवस्थाय् व वर्तमान संविधानं नं म्हमस्यूगु  संस्था तयातयेगु उचित मजु।’ 

वयकलं स्वनिगया राजनीतिक, सामाजिक, आर्थिक व प्रशासनिकलिसें मनूया चेतनाय् न व्यापक परिवर्तन जुइधुक्कुगु वर्तमान अवस्थाय् प्राधिकरणया छुं न औचित्य मदुगुलिइ खारेजीया मेगु विकल्प मदु धयादिल। ‘देशय् पञ्चायती व्यवस्था चिलावना बहुदल जुंजुं सङ्घीय लोकतान्त्रिक गणतन्त्रात्मक व्यवस्था स्थापना जुगु दु । तर, आः स्वनिगलय् न्हूगु सहर निर्माणया लागि वहे पञ्चायती ऐनय् च्वनाच्वंगु उपत्यका प्राधिकरणयात न्हयनेहयेत स्वयाच्वंगु दु । थुकिइ पुर्नविचार यायेमाः। जिमिसं सहरी विकास मन्त्री व राज्यमन्त्री निम्हसित थ्दुवहे इनाप यानागु दु ,’ श्रेष्ठं धयादिल।  

वयकलं नगरपालिका व उपत्यका प्राधिकरणया ज्या, कर्तव्य व अधिकार ९० प्रतिशतसिबें यक्व ज्वःलागु धासें सङ्घीय संरचनाकथंया स्थानीय सरकारयात बाइपास याना प्राधिकरणयात न्ह्यने हयेगु खँय् गुगू न हालतय् स्वीकार्य मजुगु धारणा तयादिल। ‘ स्वनिगया १८ गू नगरपालिकाया मेयरतयगु न मेयर धइगु भ्रम प्राधिकरणया नेतृत्वय् दु,’ वयकलं धयादिल, ‘वहे कथंया गतिविधिइ नेतृत्व न वनाच्वंगु दु । थ्व सङ्घीयताया मर्मविपरित खः । उकिं संविधानं म्हमस्यूगु  संस्था खारेज जुइमाःगु धइगु जिमिगु माग दु।’