लेले मनकामना देगः निर्माण १५ दँनिसें जुयाच्वन

लेले मनकामना देगः निर्माण १५ दँनिसें जुयाच्वन


कार्तिक २५ - यलया लेलेय् दुगु मनकामना अजिमाया देगः दयेकेज्या जुयाच्वंगु दु। 

२०६२ सालय् जनश्रमदानपाखें निर्माण सुरु जुगु देगः लागाय् आः नं जखःया पखाः च्वय् ढलान, तारजाली, च्वनेगु मेच, हिति जडान व मर्मत सुधारया ज्या जुयाच्वंगु दु। गोरखाया मनकामना अजिमाया विकल्पय् स्थापना यानातःगु देगः १५ दँ न्हय् ३ लखतकाया जनश्रमदान व २ लख तका बराबरया जिन्सी सामान मुंकाः निर्माण सुरु याःगु खः। 

२०६४ साल वैशाख २२ गते देगःया उलेज्या याःगु मनकामना फूल्चोकीमाई मन्दिर संरक्षण तथा सुधार समितिया नायः राजेन्द्र सिलवालं धयादिल। देगः दयेकुसाः नं पूर्णता बिइत् धिबाः मदुगुलिइ समस्या जुयाच्वंगु वयकया धापू दु। देगःलय् थ्यकेत स्वाहाने निर्माणया लागि गोदावरी नगरपालिकां थगुने १० लखतका व थुगुसिइ नं पुखु दयकेत १० लख तका ग्वाहालि याःगु खः। 

नगरपालिकां ग्वाहालि याःगु धिबाः व मनूतयसं ब्यूगु धिबाः याना आःतक १ करोडं मल्याक खर्च जुइधुक्कुगु देगःया संस्थापक नायः ठूलाबहादुर तामाङं धयादिल।