गुरुङ समुदायं ल्होसार, किराँत समुदायं उधौली हनाच्वन

गुरुङ समुदायं  ल्होसार,  किराँत समुदायं उधौली हनाच्वन


पुस १५ - गुरुङ समुदायं न्हूदँयात लसकुस यासें थौं ल्होसार’ नखः हनाच्वंगु दु।

‘ल्हो’ या अर्थ दँ व ‘सार’ या अर्थ हिलीगु जूगुलिं दँ हिलीगु दिंयात ‘ल्होसार’ धयातःगु खः। थुगुसिइ छुं  वर्गयात विदाया याना साः वर्गया दँ शुरू जुगु खः । थ्व पर्व सूर्द्यःया जःलिसे नं स्वापू दु । गुरुङ बाहुल्य दुगु लमजुङ, गोरखा, तनहुँ, स्याङ्जा, मनाङ, कास्की, पर्वत थुज्वःगु जिल्लाय् सूर्द्यःया क्वाःजः न्हापालाक्क वइगु जूगुलिं पुस १५ गते थ्व पर्व हनावयाच्वंगु दु। अथे हे तामाङ व शेर्पा जाति च्वनेगु यानाच्वंगु लागाय् सूर्द्यःया क्वाःजः वइगु जूगुलिं माघ व फागुनय् तामाङ्ग व शेर्पा समुदायं थ्व पर्व हनिगु खः। 
अथेहे  किराँत समुदायं थौ तःधंगु नखः उधौली हनाच्वगु दु । दँय् दँसं योमरी पून्हि खुन्हुनिसें सुरु जुइगु उधौली नखः मनू, जनावर व चखुंतय्सं लेकं बेंसीपाखे बास हिलीगु ई जुगु संकेतया रुपय् काइ । अथेहे अन्नबाली दुकागु लसताय् न थ्व नख हनिगु खः । किराँत समुदायय् अन्नबाली पिइगु बैशाख पून्हि खुन्हु उभौली हनिगु चलन दु । उधौली नखयात लिम्बुतयसं चासोक तङनाम, किराँत राइतयसं साकेला, साकेन्वा, किराँत याख्खातयसं चासुवा व किराँत सुनुवारतयसं फोलस्याँदर धका धाइ। 
थ्वहे दथुइ, राष्ट्रपति विद्यादेवी भण्डारीइ किराँत समुदायया उधौली व गुरुङ समुदायया ल्होसारया लसताय् भिन्तुना देछानादिगु दु। थज्यागु नखलं इष्टमित्र तथा आफन्तदथुइ भेटघाट लिसें मेलमिलापया अवसर नं बिइगुलिइ थुकिइ पारिवारिक, सामुदायिक व सामाजिक एकता कायम यायेत महत्वपूर्ण योगदान बिइगु धासें वयकलं नखपाखें नेपाःया थीथी  भूगोल, संस्कृति, जातजाति व भाषाभाषीया जनतादथुइ आपसी सद्भाव, सहिष्णुता व भ्रातृत्वया भावना अभिवृद्धि जुया बृहत राष्ट्रिय एकतायात  थप सुदृढ यायेत ग्वाहालि जुइगु  विश्वास प्वकादिगु दु। 
कोभिड १९ महामारीया कारण उत्पन्न  असहज परिस्थितिइ पूर्वसावधानीया उपाय अवलम्बन याना नख हनेत वयकलं फुक्कसित आह्वान यानादिगु दु।