कोरोनामुक्त जुया याकनं नागरिकया सेवाय् समर्पित जुइ : मेयर शाक्य

कोरोनामुक्त जुया याकनं नागरिकया सेवाय् समर्पित जुइ : मेयर शाक्य


भदाै १६ - येँय् महानगरपालिकाया प्रमुख विद्यासुन्दर शाक्यं कोरोनायात बुकाः याकनं नागरिकया सेवाय् समर्पित जुइगु विश्वास व्यक्त यानादिगु दु। 

मङ्गलबाः विज्ञप्ति पिकया प्रमुख शाक्यं थथे विश्वास प्वकादिगु खः। वयकलं उच्च सावधानी नाला कोभिड–१९ या नियन्त्रण व व्यवस्थापनलिसें कोरोनापाखें येँय् व स्वनिगःबासीयात जोगे यायेगु उद्वेश्य ज्वना ज्या यानाच्वंगु इलय् थःयात सङ्क्रमण पुष्टि जुगु धयादिगु दु। अथेहे शाक्यं जारी यानादिगु विज्ञप्तिइ वंगु भदौ १४ गते आइतबाः थः जहानयात १०४ डिग्रीसिबें यक्व ज्वर खनेदुगु व निम्ह नियमित परीक्षणया लागि ग्राण्डी अस्पताल थ्यबलय् कोरोना पोजेटिभ खनेदुगु न्ह्यथनादिगु दु। अस्पतालं ब्यूगु जानकारी कथं थःगु पोजेटिभ रिपोर्ट वगु व जहानया नगेटिभ वगु धासें वयकलं कोरोनाया रिपोर्ट पोजेटिभ वसाः नं मनोबल उच्च दुगु व आःतक छुं नं लक्षण खनेमदुगु धयातगु दु। 

मेयर शाक्यं विज्ञप्तिमार्फत लकडाउनया सुरुया अवस्थानिसें आः जारी निषधाज्ञातक येँय् च्वपिं व सेवाग्राहीया सेवाय् छेँय् परिवार व जीवनया नं  विचा मयासें थाकुगु अवस्थाय् नं चाःन्हि मधासें खटे जुयाच्वगु जनप्रतिनिधि व कर्मचारीप्रति उच्च सम्मान क्यनादिगु दु। 

देश–विदेशं टेलिफोन, भाइबर, म्यासेन्जरलिसें थीथी माध्यमं द्वोलंद्वो शुभेच्छुकतयसं थःगु स्वास्थ्य अवस्थाया बारेय् च्यूता क्यनाप्रति वयकलं सुभाय् देछानादिगु दु । अथेहे वयकलं विज्ञप्तिमार्फत थःयात सङ्क्रमण पुष्टि जुगु छवाःन्हय तक थःलिसें प्रत्यक्ष सम्पर्कय् वपिं फुक्कसित सचेत जुइत व आवश्यकताकथं पीसीआर परीक्षण याकेत नं इनाप यानादिगु दु। 

अथेहे वयकलं कोरोना थज्याःगु अदृश्य शत्रुलिसेंया लडाइँ  याकचा त्याकेफइमखु धासें थःथगु  ठासं एकमुष्ट प्रयास याना कोरोनायात परास्त यायेत नं अपिल यानादिगु दु। स्वास्थ्य मापदण्डयात पूर्ण पालना यायेत व सङ्क्रमित धकाः सुयात नं सुना नं दुर्व्यवहार मयायेत नं इनाप यानादिगु दु।