कोरोनाया नयेगु वासःदयेकूगु अमेरिकी कम्पनीया दावी

कोरोनाया नयेगु वासःदयेकूगु अमेरिकी कम्पनीया दावी


असोज १७- कोभिड–१९ या उपचारया लागि नयेगु वासः लूगु छगू अमेरिकी कम्पनीइ दावी याःगु दु। मर्क नांया वासः उत्पादक कम्पनीइ  कोभिड–१९ विरुद्ध मोल्नुपिरभिर नांया नयेगु चक्की उत्पादन याःगु दावी याःगु खः।

थ्व वासःया अन्तरिम क्लिनिकल परीक्षण यायेबलय् सकारात्मक परिणाम वगु दावी याःगु दु।  उगु वासलं गम्भीर लक्षण दुपिं बिरामीयात अस्पताल भर्ना यायेमालिगु  अवस्था व कोरोनाया कारणं सिगुयात बच्छि क्वःपालेफूगु लिच्व वगु दावी कम्पनीइ याःगु दु। 

मोल्नुपिरभिर चक्की कोभिडया बिरामीयात न्हिं निकः बिइमाःगु कम्पनीइ धागु दु । परिणाम उत्साहजनक जुगुलिं बाह्य अनुगमनकर्तातय्सं परीक्षणकाल क्वःपालेत इनाप याःगु उगु कम्पनीइ धागु दु।

मर्कं अमेरिकाय् आःया २ वालय् आपतकालीन प्रयोगया लागि अनुमति कायेत निवेदन बिइगु धागु दु। अमेरिकी राष्ट्रपति जो बाइडनया प्रमुख मेडिकल सल्लाहकार डाक्टर एन्थोनी फाउचीइ थ्व बालागु समाचार जूगु टिप्पणी यानादीगु दु। 

अमेरिकी खाद्य तथा औषधि नियामक निकाय एफडीएं अध्ययन यानाः मान्यता बिइगु मबिइगु निर्णय यायेगु धागु दु।