भारतीय सञ्चारमाध्यमय् वःगु खबरप्रति नेपाली सेनाया आपत्ति

भारतीय सञ्चारमाध्यमय् वःगु खबरप्रति नेपाली सेनाया आपत्ति


जेठ १६ - नेपाली सेनां छुं छुं भारतीय सञ्चारमाध्यमय् पिहाँवगु खबरप्रति आपत्ति प्वकुगु दु ।

हिन्दुस्तान टाइम्सय् म्हीगः बुधबार शिशिर गुप्तां लिसें  tfipost.com  य्  म्हिगः अक्षय नराङ्गं च्वगु समाचार भ्रामक व काल्पनिक जुगु धासें नेपाली सेनां आपत्ति प्वकुगु खः । म्हिगः बहनी विज्ञप्ति पिकया  नेपाली सेनां थुपिं समाचारप्रति ध्यानाकर्षण जुगु व थुपिं समाचार भ्रामक, दुरासयपूर्ण, काल्पनिक व निराधार जुगु स्पष्ट याःगु खः । नेपाली सेनां थुपिं समाचारं निगु मित्र राष्ट्र लिसें विशिष्ट ऐतिहासिक सम्बन्ध दुगु निगु सेनादथुइया स्वापू व विश्वासय् नकारात्मक असर थ्यकेगु  उद्धेश्यपाखें प्रेरित जुगु न धागु दु ।

राष्ट्रिय एकता थप क्वातुकेमागु आःयागु इलय्  विभाजन हयेगु व नेपाली सेनायात म्वाःमदुगु विवादय् सालेगु  मनसायं फैले यागु थज्यागु अफवाहलय् विश्वास मयायेत आम पाठक लिसें स्वाभिमानी नेपाली नागरिकयात सेनां इनाप यागु दु । नेपाली सेना नेपाःया संविधान कथं नेपाल सरकारपाखें प्राप्त वैधानिक निर्णय व निर्देशन पालना यायेत न्ह्याबलें कटिबद्ध जुगु विज्ञप्तिइ न्ह्यथनातगु दु ।

अथेहे विज्ञप्तिइ वइगु दिनय् न थीथी माध्यमं नेपाल, नेपाली नागरिक व नेपाली सेना सम्बन्धि थज्यागु अफवाह फैले यायेत कुत जुइफुगुलिइ सचेत व सजग जुइत नेपाली सेनां इनाप याःगु दु ।